VOV4.Êđê - Aguah mbruê 20/7, ti čar Vĩnh Phúc, Êpul gơ̆ng klei hlăk mblang gưl dlông pŏk leh klei kƀĭn tal 4 wưng thŭn 2021 – 2026. Nguyễn Xuân Thắng, khua hlăm phŭn bruă kđi čar, khua kiă kriê êpul gơ̆ng klei hlăk mblang gưl dlông, khua kiă kriê anôk bruă mtô mjuăt bruă kđi čar ala čar Hồ Chí Minh gĭt gai klei kƀĭn anei. Klei kƀĭn kñăm bi trông, bi mguôp boh blŭ kơ 3 hdră đru kčĕ mơ̆ng êpul gơ̆ng, đru mprăp kơ klei kƀĭn trông gưl dlông 6 gưl 13, mĭn tĭng mkŏ mjing ti mlan 10 kơ anăp, mâo wăt: Dŭm boh klei hlăk mblang klă sĭt leh 15 thŭn hluê ngă hdră mtrŭn gưl dlông 5 gưl 10 kơ bruă lŏ dơ̆ng mlih mrâo hdră gĭt gai mơ̆ng Đảng hŏng bruă ngă mơ̆ng bruă kđi čar, dŭm klei hlăk mblang klă sĭt kơ bruă mkŏ mjing leh anăn bi kluôm ênŭm ala čar yang ƀuôn ngă phŭn Việt Nam truh ti thŭn 2030, hdră tă truh ti thŭn 2045, đa đa klei hlăk mblang klă sĭt kơ hdră êlan, hdră tă bruă bi mrâo mrang ala čar truh ti thŭn 2030, hdră tă truh ti thŭn 2045. Nguyễn Xuân Thắng mtă kơ phung bi ala, phung thơ̆ng kơ bruă kñăm bi trông, đru mguôp klei blŭ hlăm dŭm hdră hưn mdah hŏng jih ai tiê, bruă klam, anăn jing tur knơ̆ng yuôm bhăn čiăng bi leh 3 klei hưn mdah hŏng phŭn bruă kđi čar, Êpul khua bruă Đảng, hmao đru kơ klei kƀĭn trông gưl dlông 6 gưl 13.

Y- Ƀel pô mblang