VOV4.Êđê - Aguah hruê 25/1, ti Anôk bruă knŭk kna, Khua hlăm Anôk bruă Đảng gưl dlông, K’iăng khua knŭk kna Lê Minh Khái gĭt gai leh klei bi kƀĭn hŏng dŭm phŭn, dhar bruă, brei klei blŭ kơ klei čih mkra hdră mtrŭn mơ̆ng knŭk kna kơ hdră krŭ wĭt, mđĭ kyar bruă duh mkra ala ƀuôn. Klah čŭn ti anôk bi kƀĭn, K’iăng khua knŭk kna Lê Minh Khái mtă kơ Phŭn bruă Hdră kčah lehanăn Duh bi liê lŏ dơ̆ng mă klei blŭ mơ̆ng dŭm phŭn, dhar bruă bi leh klei čih mkra hdră mtrŭn, ksiêm dlăng mnuih knŭk kna dlăng ba, ksiêm dlăng thiăm mbŏ mnuih dưi dưn hdră mtrŭn bi djŏ guôp. K’iăng khua knŭk kna mtă, bruă mkŏ mjing hluê ngă dŭm hdră msir brei rơ̆ng kjăp klei kčah mtrŭn mơ̆ng Phŭn bruă kđi čar lehanăn Hdră mtrŭn mơ̆ng anôk bruă kƀĭn ala, kyua anei jing hdră mtrŭn prŏng hŏng ênoh duh bi liê giăm 350 êbâo êklai prăk, lu bruă klam, hdră msir brei bi hgŭm hluê ngă hŏng klei pral mguôp hŏng hdră kčah duh bi liê hlăm wưng man dưn. Hdră mtrŭn brei kčah mtrŭn klă klơ̆ng, bruă hluê ngă hdră mtrŭn brei rơ̆ng kjăp amâo lui bluh mâo klei ngă soh./.

H’Nêč pô mblang