VOV4.Êđê- Dôk hlăm brô 3 mlan, phung hđeh sang hră adŭ 12 srăng nao hlăm klei bi lông bi ruê̆ klei hriăm gưl 3 thŭn 2022. Anei jing klei bi lông yuôm bhăn hĭn mơ̆ng phung hđeh sang hră kyua boh tŭ klei bi lông anei mâo lu sang hră gưl prŏng dưn yua leh anăn ruah mă. Ară anei dŭm sang hră dôk kñăm ksiêm wĭt, lŏ mtô bi hriăm kơ phung hđeh sang hră čiăng kơ diñu dưi mprăp kơ klei bi lông bi ruê̆ klei hriăm gưl 3, ăt msĕ hŏng nao hlăm dŭm klei bi lông mkăn mơ̆ng dŭm sang hră gưl prŏng mkŏ mjing.

Hlăm dŭm hruê anei, ăt msĕ si lu hđeh sang hră adŭ 12 mkăn, adei Nguyễn Đình Dương sang hră gưl 3 Phan Huy chú, Hà Nội gĭr bi leh dŭm klei hriăm hlăm mmông hriăm ti sang hră pral hĭn, čiăng pioh mmông lŏ hriăm, mprăp kơ klei bi lông hriăm jih gưl 3 srăng mkŏ mjing hlăm mlan 7. Klei tŭ klei bi lông srăng yua čiăng hô̆ng ruah mŭt hlăm lu sang hră gưl prŏng anăn Nguyễn Đình Chương gĭr hriăm bi jăk dŭm klei hriăm čiăng dưi mâo klei tŭ bi lông jăk hĭn. Ñu ăt čŏng tui hriăm leh anăn hriăm dŭm klei bi lông mơ̆ng dŭm gưl êlâo mơ̆ng dŭm sang hră gưl prŏng čiăng mđĭ klei găl djŏ ruah hlăm dŭm sang hră gưl prŏng:

Kâo duah lu dŭm hdră msir hrŏng ruah, hŏng lu klei bhiăn bi lông mdê mdê, dŭm klei hriăm mdê. Ƀiădah hŏng kâo, hlăm klei hriăm mâo lu klei kpĭ snăn ăt mâo klei găl jing mđĭ klei bi ktưn mơ̆ng sang hră.

 Hŏng phung bi lông thŭn anei, bruă hriăm kơ klei bi lông hriăm jih gưl 3 mơ̆ng phung hđeh dleh dlan hĭn, suăi êmăn hĭn leh 3 thŭn hriăm gưl 3 hŏng hruê mmông hriăm dleh dlan ka tuôm mâo, tăp năng hriăm ti sang hră, djŏ mmông hriăm online kyua klei ruă Covid-19. Kyua anăn, čiăng dưi lač djŏ kơ klei thâo hđeh sang hră, mơ̆ng anăn tă hdră hriăm bi djŏ guôp hŏng grăp čô hđeh, lu sang hră mkŏ mjing leh dŭm gưl bi lông ksiêm dlăng hnơ̆ng jăk wăt ti sang hră leh anăn online. Dŭm boh sang hră gưl prŏng lŏ mkŏ mjing klei bi lông hjăn čiăng hrŏng ruah anăn dŭm sang hră mkŏ mjing klei hriăm phŭn hlue si hdră tă mơ̆ng klei bi lông hriăm jih gưl 3 kơ hđeh sang hră, bi hriăm dŭm klei dleh hĭn kñăm đru kơ phung hđeh nao hlăm klei bi lông anei. Aduôn Huỳnh Thị Hòa Bình, Khua sang hră gưl 3 Lạng Giang mrô1, čar Bắc Giang hâo hưn:

Thŭn anei mâo dŭm sang hră gưl prŏng hưn mdah klei bi lông ksiêm dlăng klei thâo, anăn êngao kơ bruă hriăm mbŏ hlue si êpul klei hriăm hđeh čih anăn, phung nai lŏ kčĕ klei êmuh, klei hriăm mơ̆ng dŭm sang hră, čiăng ba mdah boh phŭn mtô bi hriăm kơ hđeh sang hră... Phung nai ăt tă hdră thiăm hŏng hđeh sang hră čiăng kơ phung hđeh dưi nao hlăm klei bi lông, dưi mâo klei ruah tŭ dưn hĭn kơ bruă phung hđeh leh ruê̆ hriăm nao hlăm sang hră gưl prŏng.

Ti lu alŭ wăl hriăm online sui kyua Covid-19, dŭm sang hră brei lŏ ktuê dlanwg hdră kčah boh phŭn hdră hriăm, wưng hriăm čiăng mâo klei mkra mlih hdră mtô bi hriăm kơ grăp êpul hđeh sang hră djŏ guôp hŏng boh sĭt. Hŏng hdră msir mkŏ mjing ktuê dlăng, mbha êpul hđeh sang hră čiăng mtô bi hriăm ƀhĭ klĭ kơ grăp êpul hđeh, mâo đa đa alŭ wăl ăt pŏk klei đru, bi hriăm kơ nai mtô adŭ 12 čiăng lŏ mtô hđeh sang hră dưi nao hlăm lu klei bi lông. Bùi Thị Kim Tuyến - Khua Knơ̆ng bruă sang hră mtô bi hriăm Hoà Bình brei thâo:

“Mkŏ mjing hriăm mjuăt ăt msĕ mơh hriăm mbŏ kơ phung nai mtô hđeh hriăm adŭ 12 msĕ si mkŏ mjing dŭm êpul phung nai kmeh gơ̆ng thơ̆ng kơ klei hriăm đru kơ phung nai ti krĭng taih kbưi. Mâo klei bi mlih leh anăn tiŏ nao phung nai êjai čiăng mơ̆ng krĭng găl ênưih nao đru kơ phung nai ti krĭng taih kbưi čiăng dưi mâo klei tŭ dưn jăk hĭn.”

 Adôk 3 mlan phung hđeh adŭ 12 srăng mŭt hlăm klei bi lông hriăm jih gưl 3. Ară anei, Phŭn bruă sang hră leh anăn mtô bi hriăm hưn mdah akŏ tui hriăm  klei bi lông hriăm jih gưl 3 thŭn 2022. Klei ktuê dlăng mơ̆ng phung nai, sang hră jing yuôm bhăn hŏng phung hđeh hlăm klei bi lông yuôm bhăn anei./.

Pô mblang: H’Zawut Ƀuôn Yă