Thŭn anei, čar Dak Lak mâo êbeh 20 êbâo čô hđeh čih anăn bi lông ti 32 anôk ti 15 kdriêk, wăl krah, ƀuôn prŏng hlăm čar. Čiăng kơ klei bi lông hriăm jih gưl 3 thŭn 2023 mâo klei tŭ dưn jăk hĭn, bruă sang hră mtô bi hriăm čar Dak Lak dôk gĭr mprăp dŭm klei găl djŏ tuôm kơ klei bi lông. Hlăm anăn boh phŭn mkra mđĭ klei thâo, klei ksiêm dlăng klei thâo hđeh sang hră čiăng mtô bi hriăm dưi mđing dlăng. Phạm Đăng Khoa, Khua Knơ̆ng bruă sang hră mtô bi hriăm čar Dak Lak brei thâo: Truh ară anei, bruă mprăp kơ klei bi lông hriăm jih gưl tlâo thŭn 2023 dôk dưi pŏk ngă djŏ hnơ̆ng. Êngao kơ bruă ktuê dlăng, ksiêm dlăng kdrăp mnơ̆ng rơ̆ng klei mtă mơ̆ng Phŭn bruă bruă sang hră mtô bi hriăm, hriăm mjuăt kơ phung knuă druh ngă bruă dlăng klei bi lông. Dŭm sang hră mâo hđeh bi lông hriăm jih gưl tlâo dôk gĭr mđĭ klei thâo, mkŏ mjing ksiêm dlăng klei thâo hlue si klei bi lông mơ̆ng Phŭn bruă sang hră mtô bi hriăm mbha mta phung bi lông hriăm mjuăt bi djŏ guôp.

“Mđing kơ phung jing phung hđeh mkhư̆ kơ klei mă klei thâo čiăng đru kơ phung hđeh leh anăn sang hră ăt mbha leh phung nai mtô mâo lu klei thâo hlăm klei mtô bi hriăm hŏng phung anei čiăng kơ phung hđeh mâo djăp klei thâo leh anăn jhŏng čiăng hgŭm hlăm klei bi lông anei”.

 Hlue si klei kčah mơ̆ng Phŭn bruă bruă sang hră mtô bi hriăm, mơ̆ng hruê 4/5, phung hđeh hlăm kluôm ala mphŭn čih anăn bi lông hriăm jih gưl 3 thŭn 2023. Wưng čih anăn truh 5 mmông tlam hruê 13/5. Phung hđeh dôk hriăm adŭ 12 ti dŭm sang hră gưl 3, anôk mtô bi hriăm nanao čih anăn bi lông hlue hdră online, phung hđeh bi lông ti êngao nao čih anăn ti anôk bi lông.

 Ƀrư̆ truh wưng mkŏ mjing klei bi lông hriăm jih gưl 3 thŭn 2023, adei Phạm Chính Tuyến, hđeh sang hră adŭ 12, Sang hră gưl 3 Lương Thế Vinh, Hà Nội ƀrư̆ ƀuh rŭng răng, kyua anei dưi dlăng jing klei bi lông yuôm bhăn hĭn êlâo kơ ruah bruă hriăm mgi dih.

“Ăt dơ̆ng bi lông leh mâo lu êlan čiăng dưi hriăm gưl prŏng. Hmei ăt dleh mơh ruah klei hriăm. Hlăm hruê kăm snăn kâo pioh 4 blư̆ nao hriăm mmăt, bi hruê mkăn snăn kâo srăng mkra klei hriăm ksiêm yap, klei Ăngle leh anăn čŏng lŏ mkra mjing. Bi klei hriăm čih tơdah dôk mmông snăn kâo srăng dlăng sa blư̆ čiăng thâo săng hĭn.”

 Klei kpĭ tơdah tuh êyuh jih ai tiê hriăm mjuăt kơ klei bi lông jing klei mĭn mơ̆ng lu phung hđeh hlăk êjai knŏng dôk êbeh sa mlan srăng mkŏ mjing klei bi lông. Anei jing wưng mjêč čiăng kơ phung hđeh lŏ ksiêm wĭt klei thâo mơ̆ng dŭm klei hriăm bi lông jih gưl 3.  Tĭng kơ dŭm sang hră čiăng bruă mtô bi hriăm kơ hđeh tŭ dưn hĭn, mbĭt hŏng bruă lŏ dlăng wĭt boh phŭn klei hriăm, phung nai lŏ mtô kơ hđeh sang hră mkra dŭm klei hriăm bi hmô. Nai Vũ Thị Minh Trang, nao mtô kơ klei čih, Sang hră gưl 2, gưl 3 Alfred Nobel brei thâo:

“Êngao kơ dŭm mmông hriăm hlăm adŭ snăn phung hđeh ăt mâo mmông hriăm mbŏ leh anăn ăt kriăng hriăm dŭm akŏ phung nai jao leh anăn hgŭm hŏng phung nai hlăm mmông mtô bi hriăm ti adŭ”.

     Wăt tơdah hlăm wưng bi hriăm mjêč, ƀiădah phung nai leh anăn phung thơ̆ng kơ bruă mtô mtă kơ hđeh sang hră brei hơĭt ai tiê, klei suaih pral, hriăm kơ klei thâo klă klơ̆ng mơ̆ng djăp mta klei hriăm. Nai prĭn Huỳnh Văn Chương, Khua Knơ̆ng bruă kriê dlăng hnơ̆ng jăk, Phŭn bruă sang hră leh anăn mtô bi hriăm hưn mtă:

“Ară anei snăn phung hđeh dôk kƀĭn hlăm hdră hriăm snăn Phŭn bruă leh anăn Knơ̆ng bruă kriê dlăng hnơ̆ng jăk hmei mtă kơ phung hđeh brei hơĭt ai tiê jhŏng leh anăn hriăm hlue si hdră, păn kjăp dŭm mta klei bi lông bi hmô mơ̆ng lu thŭn, boh nik hmei hưn mdah mơ̆ng thŭn 2023. Hmei gĭt ksiêm hriăm bi klă mta klei hriăm, boh nik klei ba yua hlăm klei bi lông čiăng dưi mâo puăng lu hĭn, čiăng dưi ksiêm bi mklă hriăm jih gưl tlâo ƀiădah djŏ guôp hlăm bruă ksiêm bi mklă hriăm gưl prŏng leh anăn klei găl mkăn.”

Phŭn bruă sang hră mtô bi hriăm brei thâo srăng mprăp jih jang kdrăp, bruă nah gŭ, hâo hưn mtô mblang kơ bruă čih anăn bi lông. Phŭn bruă sang hră mtô bi hriăm ăt mâo anôk gak răng jih hruê mlam čiăng đru msir mgaih klei mâo leh. Klei bi lông hriăm jih gưl 3 thŭn 2023 srăng mkŏ mjing mơ̆ng hruê 27 truh hruê 30-6. Boh tŭ klei bi lông mĭn tĭng srăng dưi hưn mdah hlăm hruê 18-7./.