VOV4.Êđê - Mơ̆ng hruê 4 truh kơ hruê 13/5, phung hđeh adŭ 12 hlăm kluôm ala nao bi mklă leh klei bi lông hriăm jih gưl tlâo thŭn 2022 hlăm kdrăp kriê dlăng klei bi lông mơ̆ng Phŭn bruă Sang hră m’ar mtô bi hriăm. Mta mrâo hlăm bruă anei anăn jing bi hrô hŏng klei bi mklă ti hră m’ar snăn ară anei thŭn tal êlâo, phung hđeh dưi bi mklă hluê hdră online, phung hđeh hriăm hră gưl êlâo ăt dưi bi mklă ti hră m’ar mâo Knơ̆ng bruă sang hră m’ar mtô bi hriăm alŭ wăl kčah mtrŭn. Khădah jing thŭn tal êlâo hluê ngă hdră anei ƀiădah bruă bi mklă mơ̆ng phung hđeh hriăm hră dưi mkŏ mjing jăk găl, bi hrŏ klei ngă soh čhuai lehanăn bi hrŏ hluê mmông ngă hră m’ar ti hră msĕ yang đar thŭn.

Phung hđeh sang hră adŭ 12 čih anăn bi lông online hlăm kdrăp kriê dlăng bi lông mơ̆ng hruê 4/5 truh hruê 13/5 ti sang hră gưl 3. Čiăng kơ phung hđeh bi lông mưng ngă, Phŭn bruă sang hră mtô bi hriăm pŏk hdră čiăng kơ hđeh sang hră čih anăn lông bi lông. Tài khoản jing mrô hră kak asei hđeh sang hră. Tơdah amâo mâo mrô hră kak asei dưm chip amâodah hră kak asei snăn yua mrô bi mklă anăn mâo anôk bruă kahan ksiêm mkă čiăng hrô.

Ƀri leh Phŭn bruă sang hră mtô bi hriăm pŏk hdră kriê dlăng klei lông bi lông, adei Nguyễn Xuân Mạnh, hđeh adŭ 12, Sang hră gưl 3 Phúc Lợi, Hà Nội mŭt hlăm hla pŏk web čiăng čih anăn bi lông hriăm jih gưl 3 thŭn 2022. Mâo leh 1 hruê kăm êlâo anăn čiăng lông čih anăn, anăn Mạnh knŏng luč dŭm mnĭt čiăng bi leh hră čih anăn pô hŏng 16 mta, pral hĭn lu mkă hŏng hră mơar hŏng mơar: “Hruê čih anăn lông bi lông snăn kâo ăt lông čih anăn bi lông leh anăn mâo nai mtô ktrâo lač leh anăn hruê êdei čih anăn klă sĭt snăn kâo ƀuh ăt kăn tuôm hŏng ya klei dleh dlan rei.”

Êngao kơ ƀiă mmông lu hĭn mkă hŏng hră mơar hŏng mơar, čih anăn bi lông hriăm jih gưl 3 online lŏ đru phung hđeh dưi ktuê dlăng leh anăn dưi mkra mlih klei hâo hưn pô pral hĭn, djŏ hĭn hlăm hdră čih anăn. Sa čô hđeh sang hră mkăn ti Hà Nội brei thâo: “Bruă online msĕ si ară anei snăn ktuê dlăng klei hâo hưn ăt ênưih hĭn leh klei hâo hưn hmei ka thâo snăn ñu mâo leh tinăn, hmei knŏng gư̆ tinăn hŏng klei ênưih snăk.”

Hlăm dŭm hrue tal êlâo čih anăn bi lông hriăm jih gưl 3, ênoh hđeh sang hră čih anăn ka lu, ƀiădah dŭm boh sang hră ăt dăp phung nai klam bruă ktrâo lač klei ngă hră mơar kơ hđeh sang hră. Phung nai dlăng adŭ ăt mtô kơ hđeh bruă čih anăn leh anăn ya klei bi mlih brei phung hđeh mđing. Čiăng mjing klei găl kơ phung hđeh, dŭm sang hră mprăp leh maĭ tĭng mkŏ internet hơĭt kjăp leh anăn jao kơ nai myô kdrăp mrâp mprăp đru kơ phung hđeh. Huỳnh Thị Hòa Bình, Khua sang hră gưl 3 Lạng Giang mrô 1, čar Bắc Giang brei thâo: “Hŏng phung hđeh čih anăn online snăn phung hđeh dưi yua mtam đĭng blŭ pô, amâodah maĭ tĭng phung hđeh ti sang, bruă anei ñu găl ênưih kơ hđeh. Khădah, hlăm hdră pŏk ngă hŏng hđeh sang hră snăn sang hră ƀuh phung hđeh khăng mâo dŭm mta bruă, msĕ si diñu mrâo mŭt hlăm taì khoản, bi mlih mrô hgăm, ƀiădah leh anăn snăn diñu lŏ wơr hĕ mrô hgăm pô. Sang hră dăp phung knuă druh kăp đru, leh anăn phung nai dlăng adŭ 12 ăt kăp đru nanao phung hđeh."

Êngao kơ klei găl ênưih, snăn hdră čih anăn bi lông hriăm jih gưl 3 online ăt mâo dŭm klei êdu kƀah, msĕ si êlan internet amâo hơĭt kjăp ngă kơ đa đa hđeh kbiă đuê̆ hlăm hla pŏk web hlăm hdră ngă hră mơar. Êngao anăn, bruă čih mrô ƀuôn hgŭm, să si ngă, klei hriăm mđing tal êlâo si ngă ăt ngă kơ lu hđeh mtŭk mtŭl, čiăng kơ phung nai đru. Nai Bùi Thị Hồng Duyên, Sang hră Việt- Úc, Hà Nội hâo hưn: “Năng ai tuôm hŏng klei dleh dlan kơ êlan mđung. Tal dua jing hdră čih anăn online snăn đa đa phung hđeh tuôm hŏng klei dleh dlan anăn jing kdrêč čih ƀuôn hgŭm, să amâo mâo hlăm kdrăp čih anăn. Tal 3, đa đa hđeh dôk bi mĭn kơ bruă phung hđeh bi lông klei blŭ ala tač êngao mơ̆ amâodah hơaĭ”.

Phạm Quốc Khánh, K’iăng Khua Knơ̆ng bruă kriê dlăng (Phŭn bruă sang hră mtô bi hriăm) brei thâo, anei jing gưl tal êlâo pŏk ngă kơ hđeh sang hră adŭ 12 čih anăn bi lông online, anăn Phŭn bruă lông ngă čih anăn online ti 2 sang hră gưl 3 krĭng dleh dlan ti čar Bắc Giang leh anăn Hoà Bình leh anăn klei tŭ phung hđeh hlue ngă čih anăn online găl ênưih snăn: “Ti 2 boh sang hră gưl 3 ti alŭ wăl dleh dlan mơ̆ng jih 2 alŭ wăl anei, klei tŭ tal êlâo phung hđeh hơ̆k mơak leh anăn ênưih hlue ngă. Dlăng grăp coco hđeh bi lông snăn dưi ƀuh phung hđeh mơak leh anăn hlăm wưng bhiâo, 3 mnĭt ngă leh, mta phŭn jing kdrăp ngă ăt thâo mĭn leh anăn hlăm anăn lŏ čuê sa hlăm dŭm klei đru mguôp yuôm bhăn mơ̆ng phung nai hlăm bruă gĭt gai anăn jing ktuê dlăng leh anăn bi leh ênoh mrô bruă sang hră leh anăn dua sang hră ti krĭng dleh dlan mơ̆ng 2 alŭ wăl anăn snăn 100% phung hđeh mâo mrô bi mklă anăn.”

Hŏng phung hđeh bi lông êngiê, leh jao hră mơar čih anăn bi lông hriăm jih gưl 3 online ti anôk bruă kyua Knơ̆ng bruă sang hră leh anăn mtô bi hriăm kčah, phung hđeh srăng mâo anôk bruă čih anăn mkăp tài khoản, jing mrô hră kak asei dưp čhip amâodah hră kak asei phung bi lông leh anăn mrô hgăm čiăng mŭt hlăm kdrăp kriê dlăng klei bi lông.

Phŭn bruă sang hră leh anăn mtô bi hriăm mtă, brei phung hđeh pioh hgăm klei hâo hưn leh anăn mrô hgăm. Tơdah tăm wơr hĕ tài khoản leh anăn mrô hgăm, brei phung hđeh blŭ hrăm hŏng sang hră - anôk čih anăn bi lông čiăng dưi lŏ mkăp brei./.