VOV4.Êđê - Adŭ bruă Êpul gĭt gai mơ̆ng ala čar kơ bruă gang mkhư̆ klei truh yan adiê mrâo mâo hră mtrŭn mjêč mơĭt kơ êpul gĭt gai bruă gang mkhư̆ klei truh yan adiê leh anăn tui duah đru dŏng čar Lâm Đồng kơ bruă bi mdrơ̆ng hŏng hjan prŏng, êa lip ti alŭ wăl krông Cam Ly. Hluê si anôk bruă đăo knăl yang adiê ala čar hưn, mơ̆ng hruê 20 - 23/5, alŭ wăl krĭng Lăn Dăp Kngư mâo hjan prŏng. Čiăng mâo hdră mdrơ̆ng hŏng klei êa lêč mâo nanao ti alŭ wăl krông Cam ly, adŭ bruă êpul gĭt gai mơ̆ng ala čar kơ bruă gang mkhư̆ klei truh yan adiê mtă kơ čar Lâm Đồng ktuê dlăng kjăp dŭm klei đăo knăl yan adiê, hưn brei răng kơ hjan prŏng, êa lêč, dlưh lăn čiăng hmao hưn mthâo hŏng dŭm gưl bruă sang čư êa, mnuih ƀuôn sang, dŭm anôk bruă hiu čhưn ênguê, phung tuê, boh nik jing phung tuê mơ̆ng ala tač êngao, čŏng pô dêč đuê̆, rơ̆ng klei êđăp ênang kơ mnuih, ngăn drăp leh anăn bruă mkra mjing. Tiŏ nao êpul ba anăp gang mkhư̆ klei truh yan adiê nah gŭ ksiêm dlăng dŭm alŭ mnuih ƀuôn sang krĭng tlŭng, alŭ wăl mâo klei hŭi hyưt dlưh lăn ktuê hang krông Camly, găn nao dŭm kdriêk Đức Trọng, Lâm Hà, ƀuôn prŏng Đà Lạt…Čiăng čŏng mkŏ mjing, mbĕ đuê̆ mnuih ƀuôn sang tơdah mâo êa lêč, bi hluh êlan êa, gang mkhư̆ klei dlưh lăn.

Y-Ƀel pô mblang