Ară anei, jih jang dŭm phŭn, dhar bruă alŭ wăl bi leh hdră bruă sa boh ƀăng yua kdrăp hâo hưn hlăm klei tŭ mă, msir mgaih hră mơar; msir mgaih êlâo leh anăn djŏ wưng kčah mơ̆ng 95% kơ dlông.

Mâo hŏng anei sa mlan, aduôn Phạm Thị Lệ, ti să Lương Phi, kdriêk Tri Tôn, čar An Giang nao ti anôk bruă tŭ mă leh anăn ba wĭt hră mơar mghaih msir hră mơar knŭk kna kdriêk ngă hră yua lăn. Hluê si klei čuăn, leh sa mlan kơh mâo hră hrah. Ƀiădah knŏng 20 hruê, ñu mâo leh klei čih mơĭt hlăm đĭng blŭ mâo leh boh tŭ:

Mkă lăn leh anăn mâo hră bi klă hruê. Nao ti anôk ngă hră mrô 2, leh anăn mrô 5, arăng brei kơ pô dŭm pŏk. Arăng atăt pô nao ti anôk ngă hră mơar mrô 5, tla prăk leh anăn nao ti anôk ngă hră mơar mrô 2. Diñu ngă bruă, ktrâo kơ pô ăt hmar mơh.

Mnuih ƀuôn sang nao ngă hră mơar knŭk kna ti anôk bruă kdriêk Tri Ôn knŏng mă mrô dôk guôp hluê si dŭm mta bruă dưi mbha leh, leh anăn ba hră mơar ti ƀăng bhă nah dih, mă hră bi klă hruê leh anăn truh hruê nao mă mâo klei čih mơĭt hlăm đĭng blŭ kơ mnuih ƀuôn sang nao mă hră mơar. Tinei mâo kdrăp bi klă, brei puăng phung knuă druh čiăng kơ mnuih ƀuôn sang bi klă klei mă bruă mơ̆ng phung knuă druh, phung mă bruă knŭk kna. Amâodah mnuih ƀuôn sang ăt dưi mơĭt hră mơar điện tử hŏng kdrăp mâo leh. Đỗ Minh Trí, k’iăng khua kiă kriê bruă sang čư êa kdriêk Tri Tôn brei thâo:

      Phung mă bruă knŭk kna mâo klei mĭn bruă klam hŏng mnuih ƀuôn sang, hŏng ai tiê đru kơ mnuih ƀuôn sang, mơ̆ng bruă klam anăn đru hluê ngă hdră ƀăng bhă pŏk hlăm sa, kdriêk, boh nik jing amâo mâo klei čôñ ăl. Ară anei kdriêk, wăt hlăm să mghaih msir 5 sa anôk. Bi hŏng mnuih ƀuôn sang Tri Tôn mâo klei klă mngač, bi êdah klă dŭm mta phŭn mnuih ƀuôn sang hriê ngă hră mơar ya klei čiăng. Tơdah mnuih ƀuôn sang čiăng lač kơ sa čô knuă druh srăng lač tinăn mtam.

Bi ti anôk bruă ngă hră mơar knŭk kna čar Dak Lak, anôk tŭ mă, mghaih msir leh anăn ba wĭt boh tŭ mghaih msir hră mơar knŭk kna mơ̆ng 20 knơ̆ng, dhar bruă, hlăm anăn mâo 2 anôk bruă gưl dlông jing Kahan ksiêm čar leh anăn Ênua yang ƀuôn čar, jih jang dŭm hră mơar dưi tŭ mă, ba wĭt ti anôk bruă dưi ba hlăm kdrăp klei hưn sa ƀăng bhă điện tử mơ̆ng čar leh anăn phần mềm thơ̆ng kơ bruă. Ayŏng Lương Trung Thành ti kdriêk Ea H’leo brei thâo: knŏng luč mă 5 mnĭt ñu dưi ngă leh djăp hră mơar akâo mlih mrâo hră mgăt êdeh leh anăn guôn mă hŏng êlan dăng kông.

Êlâo dih grăp blư̆ ngă hră mơar jing êmăng sơnăk, mơ̆ng bruă anei truh kơ bruă duh, ƀiădah ară anei knŏng bhiâo riâo rĭt leh yơh. Ƀuh klei hmar, găl kơ mnuih ƀuôn sang êrô nao.

Čiăng mđĭ hnơ̆ng tŭ jăk bruă mghaih msir hdră mơar knŭk kna, ară anei dŭm anôk bruă ngă hră mơar tŭ mă leh anăn ba wĭt boh tŭ mghaih msir hră mơar knŭk kna ti anôk bruă ngă hră mơar knŭk kna čar Dak Lak dôk mtrŭt mđĭ hdră ngă bruă “Amâo mâo guôn” hŏng dŭm mta hră mơar mghaih msir ƀiă hruê, ênưih, mghaih msir hră mơar amâo mâo djŏ tuôm hŏng lu anôk bruă mkăn.

Bi klă kơ klei bi hmô sa ƀăng bhăn mlir, sa ƀăng bhă điện tử hlăm bruă mghaih msir hră mơar knŭk kna, k’iăng nai prŏng, nai prĭn Ngô Thành Can, k’iăng khua kiă kriê hđăp anôk bruă mkŏ mjing hră mơar knŭk kna, Anôk bruă ksiêm hriăm bruă knŭk kna ala čar lač, bruă hluê ngă dŭm hdră êlan sa ƀăng bhă dưi đru mghaih msir dŭm mta hdră mơar dleh, mtŭk mtŭl. Hdră kiă kriê mơ̆ng knŭk kna, bruă hră mơar knŭk kna dưi bi ênưih, bi khuăt. Leh anăn yuôm bhăn hĭn jing ba wĭt sa djŏ ai kơ mnuih ƀuôn sang.

       Bi mguôp hdră sa ƀăng bhă klă anăp hŏng điện tử čiăng mkŏ mjing klei găl kơ grăp čô, êpul êya, bi hro mmông ngă hră mơar knŭk kna. Êngao kơ khuăt, bi hrŏ mmông, lŏ mkiêt mkriêm kơ drei kyua bi hrŏ ênoh sa ƀăng bhă, bi hrŏ ênoh prăk yua hră mơar, mmông dôk guôn leh anăn dŭm mta prăk mkăn. Ba wĭt klei đăo knang kơ mnuih ƀuôn sang.

            Ară anei dŭm alŭ wăl ăt ba mdah hdră êlan mđĭ kyar hdră “Mlih mrâo bruă hluê ngă hdră “sa ƀăng bhă”, “Sa ƀăng bhă mlir” hlăm bruă mghaih msir hră mơar knŭk kna” hŏng mta kñăm truh ti thŭn 2025, mlih mrô hră mơar, boh tŭ mghaih msir hră mơar knŭk kna ti dŭm anôk bruă “sa ƀăng bhă” dŭm knơ̆ng, dhar bruă leh anăn anôk bruă knŭk kna gưl kdriêk, să.