VOV4.Êđê - Dŭm hruê êgao, hlei pô khăp čiăng kơ Đà Lạt, khăp kơ êa mil mtah mda mơ̆ng dŭm đang hngô mâo sơăi klei hơưim kdjăt tơdah thâo mâo dŭm êtuh phun ana hngô ti dliê akŏ êa mâo phung măk ƀai druôm êbuh mtŭk mtŭl. Wăt kơ khua gĭt gai bruă sang čư êa alŭ wăl leh anăn dŭm anôk bruă djŏ tuôm čar Lâm Đồng ăt mâo klei kdjăt leh anăn klei anei hưi kyua klei ngă soh anei. Anei dưi yap jing klei bi rai dliê kjham hĭn mơ̆ng êlâo truh kơ ară anei ti ƀuôn prŏng Đà Lạt, čar Lâm Đồng.

Mơ̆ng êlan dơ̆ng prŏng ala čar mrô 27C, găn dliê phă Dưr hlăm brô 3 km truh ti anôk arăng bi rai dliê kjham anei jing wăl A, B, anôk 15, čuê dliê 144B, ƀuôn hgŭm mrô 8, ƀuôn prŏng Đà Lạt, čar Lâm Đồng. Anei jing kdrăn dliê hrông hlăm wăl bi knông plah wah kdriêk Lạc Dương leh anăn Đà Lạt, kdrêč dliê amei mâo Anôk bruă kriê dlăng dliê bi msiam kiă kriê. Dŭm êtuh phŭn ana hngô 3 pŏk hla arăng koh druôm mtŭk mtŭk ti sa kdrêč čư̆ dlông, riêng gah kdrăn dliê hngô mtah mda leh anăn jăk siam. Tinei, êngao kơ klei arăng koh druôm msĕ si čiăng mdjiê jih ana hngô p’prŏng wăt đơđiêt, arăng lŏ khăt kdrêč đơđiêt hlăm lu anôk.

Trung tá Phạm Thị Thu Hiền, Êpul kahan ksiêm kơ bruă duh mkra, kahan ksiêm ƀuôn prŏng Đà Lạt, mnuih hlăm êpul ksiêm dlăng anôk bi rai dliê anei ur lač, klei koh druôm kyâo anei jing jhŏng snăk, diñu yua anuă masin djă hŏng kngan čiăng khăt lu. Hŏng ênoh êbeh 400 phŭn hngô arăng druôm snei snăn amâo dưi ngă ôh hlăm sa hruê. “Ti gŭ adih arăng mrâo druôm hruê mbruê, hruê mdih, bi anôk anei snăn năng ai arăng druôm leh sui hĭn kyua hla hngô kñĭ leh. Jing koh druôm sui hruê leh, ngă nanao tinei, sui 2-3 hruê arăng koh druôm sa blư̆.”

Êngao kơ jhŏng leh anăn dlăng kơ hdră bhiăn hơaĭ mang, phung koh druôm kyâo lŏ jing phung thâo kơ bruă, mâo lu klei thâo druôm kyâo dliê. Bi mklă kơ klei anei, anăn jing ti dŭm anôk khăt phŭn hngô dưi ngă khuăt, kpă; ana hngô êbuh hlue si êlan dăp pruê̆ ƀiădah amâo mtŭk mtŭl ôh, kpă khuăt msĕ si ƀĭng ngă lŏ hma hrui êmiêt mnơ̆ng dhơ̆ng lŏ hma.

Êngao anăn, ana kyâo dliê arăng koh druôm jing hlăm krĭng bi knông hlăm kdrêč dliê mơ̆ng Anôk bruă kriê dlăng dliê bi msiam kiă kriê. Bruă anei knŏng phung mâo klei thâo klă kơ lăn êa amâodah mâo klei đru, ktrâo lač mơ̆ng phung kriê dlăng dliê kơh dưi ngă.

 Kyua anôk bi rai dliê kbưi hŏng wăl mnuih ƀuôn sang leh anăn hlăm ênhă prŏng, truh aguah 18/5, dŭm anôk bruă djŏ tuôm ăt lŏ dơ̆ng ksiêm dlăng anôk arăng bi rai dliê, yap kyâo arăng bi rai amâodah klei luič liê. Hluê si Lê Thái Sơn, pô mâo klei dưi mơ̆ng Khua răng mgang dliê ƀuôn prŏng Đà Lạt, anôk dliê arăng bi rai jing krĭng êlam hlăm dliê, bruă găn êrô čiăng mkra mjing leh anăn dŭ mdiăng kyâo jing dleh snăk, kyua anăn hdră bi rai dliê dleh dưi bi mklă. “Anôk arăng bi rai jing anôk dleh dlan kơ lăn čư̆ êa, dôk ti krah dliê, amâo mâo êlan nao, amâo siă knông hŏng pưk hma ôh. Leh thâo ƀuh anôk arăng bi rai dliê, êpul bruă djŏ tuôm ti ƀuôn prŏng Đà Lạt gĭr ksiêm dlăng duah phung bi rai dliê.”

 Hlăk êjai anăn, Nguyễn Văn Sơn, K’iăng Khua Knơ̆ng bruă sang čư̆ êa ƀuôn prŏng Đà Lạt brei thâo, anei jing klei koh druôm ana hngô prŏng hĭn mơ̆ng êlâo truh ară anei ti alŭ wăl. Krĭng anei čư̆ dlông dleh găn êrô, dưi dlăng jing krĭng ƀiă mâo klei hmaĭ kơ dliê. Kyua anăn leh klei bi rai dliê mâo tinei ngă kơ khua gĭt gai bruă sang čư̆ êa bi kngăr snăk. Leh anăn anei ăt jing mta phŭn ngă thâo ƀuh êmưt, amâo hmao mă. Ăt hlue si Sơn, êngao kơ ênoh kyâo dliê arăng koh druôm lŏ mâo êbeh 100 phŭn hngô mkăn hlăm krĭng wăl mâo arăng ktir, tuh êa drao brei ana djiê ƀrư̆ ƀrư̆. Ară anei anôk bruă djŏ tuôm dôk mjêč ksiêm dlăng bi mklă."Klei bi mklă tal êlâo jing krĭng wăl amâo mâo klei huĭ hyưt lu ôh snăn hnơ̆ng ksiêm dlăng srăng hrŏ. Kyua amâo dưi bi mklă ôh anăn jing krĭng phŭn anăn mrâo thâo ƀuh. Bi hdră kñăm bi rai dliê snăn khăng nao ti anôk arăng bi rai dliê bi mklă thâo mtam, ƀiădah hŏng klei bi rai dliê anei snăn ăt ka dưi bi mklă ôh. Ƀuôn prŏng dôk gĭt gai anôk bruă kahan ksiêm leh anăn dŭm dhar bruă kƀĭn ksiêm dlăng, brei duah bi ƀuh phung bi rai dliê anei čiăng đŭ bi kmhal. Mbĭt anăn bi mklă hdră kñăm bi rai dliê anei”.

 Ti anăp klei kjham mơ̆ng klei mâo, hruê 17/5, Knơ̆ng bruă sang čư̆ êa čar Lâm Đồng mâo hră mơar gĭt gai dŭm anôk bruă djŏ tuôm mjêč ksiêm dlăng, đŭ bi kmhal leh anăn hưn mdah klei bi rai dliê soh hdră bhiăn anei. Mbĭt hŏng anăn, êngao kơ anôk bruă pô dliê mjêč čih mkra hdră kčah bi rai dliê, kơrŭ wĭt dliê hlăm ênhă dliê arăng bi rai, Knơ̆ng bruă sang čư̆ êa čar Lâm Đồng lŏ dơ̆ng gĭt gai Khua Knơ̆ng bruă sang čư̆ êa ƀuôn prŏng Đà Lạt mkŏ mjing ksiêm wĭt bi mklă bruă klam dŭm anôk bruă leh anăn phung djŏ tuôm čiăng đŭ ni kmhal hlue si hdră bhiăn./.