VOV4.Êđê - Leh 3 hrue mă bruă hŏng klei êngiê lehanăn kjăp aguah mbrue (11/3), klei bi kƀĭn prŏng Êpul hgŭm bruă mniê tal 13 kluôm ala kƀĭn klei bi ruĕ. Klei bi kƀĭn bi klă hdră mtrŭn klei bi kƀĭn prŏng 13 Êpul hgŭm bruă mniê Việt Nam hŏng mta kñăm: Mđĭ hĭn knhuah gru, ai tiê bi mguôp, hŏng klei mbruă, čŏng ñŭ kma, mâo ai tiê čŏng ngă phŭn mơ̆ng dŭm gưl phung mniê, mkŏ mjing kjăp Êpul hgŭm, jih ai tiê mkŏ mjing Đảng, mkŏ mjing bruă kđi čar, răng mgang klei dưi, lehanăn klei tŭ dưn kơ phung mniê. Ktưn truh kơ thŭn 2030, bi hdơr 100 thŭn hrue mkŏ mjing Êpul hgŭm bruă mniê Việt Nam, bi klă k’hưm mơ̆ng Êpul hgŭm jing pô ba anăp kyua klei jăk yâo kơ phung mniê, mâo klei hmăi jăk hŏng alŭ wăl lehanăn tar rŏng lăn, đru ba wĭt klei tŭ dưn mđĭ kyar lăn čar. Hdră mtrŭn klei bi kƀĭn ăt čoh čuăn grăp thŭn đru 33 êbâo 500 gŏ êsei amai adei mniê tlaih mơ̆ng klei dleh dlan, klei ƀun ƀin, đru bi hriăm bruă knuă kơ 17 êbâo čô phung mniê jing khua anôk duh mkra, kiă kriê êpul hgŭm bruă mâo phung mniê jing khua. Grăp thŭn Êpul hgŭm mtrŭt mjhar, đru thiăm 5 gŏ êsei djăp ênoh čuăn “gŏ êsei 5 hơăi, 3 doh”, amâodah “Gŏ êsei 5 mâo, 3 doh”./.

Y-Khem pô mblang