VOV4.Êđê - Tlam mbruê 19/1, dhar bruă gĭt gai bruă kƀĭn ala bi ruê̆ leh klei kƀĭn tal 7. Blŭ hlăm klei bi ruê̆ anăn, Khua bruă kƀĭn ala Vương Đình Huệ mtă, hlăm hruê mmông kơ anăp srăng mâo klei hlăk mblang jăk hĭn kơ bruă mbha hnư, bruă yua ngăn prăk knŭk kna leh anăn bruă ksiêm êmuh leh anăn wĭt lač klei ksiêm êmuh hlăm dhar bruă gĭt gai bruă kƀĭn.

Khua bruă kƀĭn ala Vương Đình Huệ ăt mtă kơ sang phat kđi gưl dlông lŏ ksiêm dlăng kơ kdrăp čŭt hơô mơ̆ng êpul khua phat kđi leh anăn mđĭ hĭn kơhưm hlăm klei phat kđi, mđĭ hnơ̆ng klei phat kđi. Khua bruă kƀĭn ala Vương Đình Huệ lŏ mñă, čiăng ksiêm dlăng klă hĭn dŭm bruă ngă mơ̆ng dhar bruă gĭt gai bruă kƀĭn ala hlăm thŭn 2021 čiăng mđing truh kơ klei ngă bruă hlăm thŭn anei leh anăn mprăp kơ gưl kƀĭn tal 3, bruă kƀĭn ala gưl 15 hŏng mta kñăm jing bruă čih mkra klei bhiăn ala čar. Hlăm anăn bruă ba mdah kơ bruă kƀĭn ala ksiêm dlăng, bi klă dŭm hdră mkăp klei bhiăn dưi brei boh blŭ hlăm gưl klei kƀĭn tal 2 leh anăn brei boh blŭ hŏng dŭm hdră mkăp klei bhiăn ba mdah hŏng bruă kƀĭn ala tal êlâo hĭn.

Y-Ƀel pô mblang