VOV4.Êđê - Ti sang Bruă kƀĭn ala, Anôk bruădhar kreh, mjuăt bi hriăm mơ̆ng Bruă kƀĭn ala hgŭm hŏng Phŭn bruă mnuih ngă bruă, phung knap mñai, lehanăn Anôk bruă ala čar kơ êdam êra Việt Nam mkŏ mjing klei trông čhai kơ hdră êlan ala čar hŏng êdam êra thŭn 2022 hŏng akŏ "Mjuăt bruă knuă mă kơ phung êdam êra".  Ti anăn phung bi ala mâo leh klei blŭ hrăm kơ dŭm bruă yuôm bhăn msĕ si: Kơ dŭm hdră êlan mơ̆ng Đảng, knŭk kna kơ klei mjuăt bi hriăm bruă knuă hŏng jih jang phung êdam êra kơ klei akâo kơ bruă mjuăt bi hriăm êdam êra duah bruă hlăm wưng dôk găn klei ruă tưp, lehanăn hdră êlan bi mlih ênuk mrâo mrang, mbĭt hŏng djăp mta bruă mkăn djŏ tuôm msĕ. Klei trông čhai ăt pŏk mơh klei găl čiăng kơ êdam êra bi êdam klei hmăng hmưi pô akâo kơ dŭm anôk bruă knŭk kna mđing kơ bruă mjuăt bi hriăm bruă knuă. Mơ̆ng anăn, đru kơ dŭm anôk bruă djŏ tuôm păn kjăp, lehanăn mâo hdră êlan mghaih msir kơ jih jang bruă, đru mđĭ klei thâo săng kơ êdam êra lehanăn kluôm yang ƀuôn kơ klei mjuăt bi hriăm bruă knuă./.

Y-Khem pô mblang