Hŏng dŭm klei găl čŏng mâo êlâo, Gia Lai dưi mkŏ mjing leh anăn mđĭ kyar lu đang war pla mjing bruă lŏ hma, dưn yua kdrăp mrâo đru kơ bruă mkra mjing leh anăn mnia mblei. Lu mta mnơ̆ng dhơ̆ng phŭn mâo ênoh dưi ba čhĭ truh kơ 40 ala čar leh anăn krĭng wăl. Ară anei čar mâo 3 anôk bruă tuh tia, leh anăn čuăl mkă 23 anôk bruă tuh tia. Phŭn mkăp boh mnga bruă lŏ hma ti alŭ wăl jing lu jơr, hơĭt msĕ si: Kphê, ksu, kbâo, hbei ƀlang, čê, boh kroh… mkŏ mjing tur knơ̆ng čiăng mđĭ kyar bruă tuh tia mkra mjing…Klei găl prŏng msĕ si Phạm Văn Binh, khua kiă kriê knơ̆ng bruă tuh tia čar Gia Lai, dŭm mta bruă logistics ti alŭ wăl čar ka dưi đĭ kyar kyua adôk mâo lu klei kpăk gun.

“Hlăm djăp mta bruă mâo sơăi klei dleh dlan, čuăl mkă ka kluôm dhuôm, tal 2 jing wăt tơdah mâo jar mkŏ lu ƀiădah bruă mkŏ mkra đru kơ bruă logistics ăt dôk mâo klei kpăk. Mnuih mă bruă ƀiă leh anăn wăt kơ thâo săng ênŭm kơ logisticss ăt dôk jing klei ka ênŭm ôh”.

Hlăm klei kƀĭn trông, pô bi ala dŭm anôk bruă hlăm Phŭn bruă tuh tia, Êpul hgŭm mnơ̆ng dhơ̆ng leh anăn phung duh bi liê, knơ̆ng bruă kah mbha leh lu klei blŭ mguôp čiăng mđĭ kyar bruă logistics ti Gia Lai. Phung bi ala lač, čiăng mđĭ hĭn klei thâo săng kơ bruă logistics, bruă klam mơ̆ng logistics hŏng klei mđĭ kyar bruă duh mkra ala ƀuôn, tă hdră mkra mjing mnia mblei nao mbĭt hŏng bruă mtrŭt mđĭ bruă logistics leh anăn bi mguôp plah wah dŭm knơ̆ng bruă hlăm leh anăn êngao čar. Lê Quang Trung, k’iăng khua kiă kriê Êpul hgŭm knơ̆ng bruă logistics Việt Nam brei thâo:

          “Hŏng čar Gia Lai amâodah kluôm krĭng Lăn Dăp Kngư, lăn yua ngăn dŏ jing lu êdi, dŭm knơ̆ng bruă srăng dưn yua klei găl krĭng dlông, dưn yua hdră êlan mơ̆ng knŭk kna hlăm klei đru, mđĭ kyar dŭm knơ̆ng bruă mơ̆ng mnuih djuê ƀiă. Klei bi mguôp plah wah hdră êlan leh anăn hluê ngă hlăm boh sĭt jing boh kdrŭt yuôm bhăn čiăng mđing truh kơ dŭm klei bi mklin. Čiăng mâo klei bi mguôp jăk plah wah dŭm knơ̆ng bruă Logistics hlăm klei mkăp brei, mkŏ hŏng phung mkra mjing leh dŭm klei dŭ mdiăng leh anăn sang hdjiê.”

Hluê si Trần Thanh Hải – K’iăng khua kiă kriê anôk bruă mnia mblei, Phŭn bruă tuh tia, čiăng bi lar dŭm klei găl, Gia Lai čiăng mâo dŭm hdră êlan kdlưn hĭn, dưi ngă čiăng iêo jak lu ai dưi yang ƀuôn, dŭm êpul grŭp, knơ̆ng bruă mâo kơhưm, ai dưi, klei thâo hlăm klei duh bi liê, mđĭ kyar bruă logistics.

“Iêo jak dŭm knơ̆ng bruă pŏk anôk bruă, rŭ mdơ̆ng anôk bruă ti Gia Lai srăng đru bi luh phŭn mkăp mnơ̆ng dhơ̆ng. Čiăng iêo jak knơ̆ng bruă srăng mâo bruă ngă klă klơ̆ng mâo knhuah iêo jak leh anăn đru. Sitôhmô dưi mkŏ mjing dŭm êpul hưn mdah duh bi liê mtrŭt mđĭ dŭm mta mnơ̆ng dhơ̆ng mơ̆ng čar ti dŭm alŭ wăl mơ̆ng Việt Nam ăt msĕ hŏng mkŏ hŏng dŭm čar msĕ si Lào, Campuchia ăt yuôm bhăn čiăng hrăm mbĭt ba yua dŭm klei găl”.

Čiăng lŏ dơ̆ng bi lar tŭ dưn dŭm klei găl, ai ktang, mtrŭt mđĭ bruă logistics đĭ kyar pral leh anăn kjăp, đru mguôp hur har, tŭ dưn hĭn hlăm klei đĭ kyar mbĭt mơ̆ng čar, hŏng bruă klam jing anôk bruă kriê dlăng knŭk kna kơ bruă logistics, bi kơ tĭng Phŭn bruă tuh tia, Trần Thanh Hải mtă sơnei, bruă sang čư êa čar Gia Lai lŏ dơ̆ng hyuă kjăp dŭm klei mĭn, hdră tă hlăm hdră mtrŭn mrô 163 mơ̆ng knŭk kna kơ bruă mtrŭt mđĭ, mđĭ kyar bruă logistics Việt Nam leh anăn dŭm hdră mtrŭn, hdră êlan mđĭ kyar mơ̆ng Đảng, knŭk kna djŏ tuôm ti krĭng krĭng Lăn Dăp Kngư čiăng ngă tur knơ̆ng čuăl mkă leh anăn mkŏ mjing hluê ngă tŭ dưn dŭm hdră êlan, hdră mkăp kơ klei đĭ kyar bruă logistics rơ̆ng djŏ hŏng boh sĭt leh anăn ba yua dŭm klei găl, ai ktang mơ̆ng alŭ wăl./.