VOV4.Êđê - Ƀĭng ngă lŏ hma leh anăn anôk bruă duh mkra ti krĭng Lăn Dap Kngư dôk bi hgŭm mjing krĭng pla ana boh kroh hnơ̆ng jăk, dưi mkăp mrô bi klă anăn hŏng hdră pla mjing rơ̆ng hnơ̆ng jăk, sa anăn kơ mnơ̆ng dhơ̆ng ba klei tŭ dưn kơ ƀĭng ngă lŏ hma leh anăn anôk bruă duh mkra ba čhĭ kơ ala tač êngao hŏng ênoh yuôm leh anăn mđĭ bruă lŏ hma đĭ kyar hơĭt kjăp.

Čar Lâm Đồng ară anei mâo hlăm brô 10 êbâo ha boh durian lehanăn anei jing sa hlăm dŭm mta mnơ̆ng lŏ hma mâo boh tŭ yuôm ti alŭ wăl. Võ Hữu Long – Khua anôk bruă pla mjing mnia mblei Long Thủy, să Lộc An, kdriêk Bảo Lâm, čar Lâm Đồng brei thâo, wăl anôk mnia mblei lehanăn bruă ba čhĭ boh durian kơ ala tač êngao h’ĭt kjăp, ƀiădah boh tŭ yuôm mơ̆ng mta ana anei đĭ lehanăn h’ĭt kjăp hĭn hlăk krĭng pla boh durian bi mklă leh mtô krĭng pla mjing, kpă mngač hlăm hdră pla, dlăng kriê, hrui êmiêt, mkra lehanăn đŭng hruh. Boh nik, hŏng bruă mkăp mrô anôk pla, anôk bruă duh mkra dưi ba čhĭ kơ ala tač êngao hŏng klei găl, ba wĭt hnư hrui wĭt h’ĭt kơ mnuih pla lehanăn anôk bruă duh mkra: “Mrô anôk pla mkăp leh, VietGAP djăp ênŭm, leh rơ̆ng mâo hră dưi ba čhĭ kơ ala tač êngao snăn ênoh kâo hrui blei mkă hŏng wăl anôk blei mnia srăng đĭ mơ̆ng 15 – 20 êbâo prăk/kg. Hŏng ênhă pla mkăp mrô, kâo bi hgŭm leh hlăm hdră hrui blei kluôm, mrâo êgao dưi siñê bi mklă 6 êbâo ton”.

Mkŏ mkra krĭng pla bi hgŭm kluôm ăt dưi mtrŭt mđĭ ti čar Dak Nông hŏng lu mta mnơ̆ng pla msĕ si boh durian, boh čêñ hruê̆, boh soai, boh ƀơr. Lu krĭng pla ti alŭ wăl čar dưi mkăp leh mrô bi mklă anôk pla mkăp kơ bruă ba čhĭ kơ ala tač êngao. Bùi Phú Tôn, Khua anôk bruă mnia mblei, ba čhĭ mnơ̆ng kơ ala tač êngao Nghiệp Xuân, să Dak Nia, ƀuôn prŏng Gia Nghĩa, čar Dak Nông brei thâo, hŏng bruă mkŏ mjing hdră bi hgŭm, dŭm mta mnơ̆ng ti anôk bruă mâo hnơ̆ng tŭ jăk, ba wĭt klei tŭ dưn tơdah dưi ba čhĭ kơ ala tač êngao: “Wăl anôk mnia mblei brei pô ba čhĭ kơ ala tač êngao hŏng klei jăk găl. Bruă ba čhĭ brei drei mâo mrô bi mklă anôk pla, mrô bi mklă anôk đŭng hruh hluê si hnơ̆ng čoh čuăn, amâo dưi ngă msĕ êlâo ôh”.

Nguyễn Thị Tình, K’iăng khua knơ̆ng bruă lŏ hma mđĭ kyar krĭng ƀuôn sang čar Dak Nông brei thâo, truh kơ ară anei, knơ̆ng bruă răng mgang mnơ̆ng pla mjing mkăp leh kơ čar 38 mrô bi mklă krĭng pla lehanăn mrô bi mklă anôk đŭng hruh. Čiăng dưi mâo hnŏng čuăn mkăp mrô bi mklă krĭng pla, brei mnuih ngă lŏ hma bi mlih hdră pla mjing, ksiêm dlăng hnơ̆ng tŭ jăk, boh nik ksiêm dlăng dŭm mta mnơ̆ng amâo jăk. Hŏng bruă mkăp mrô bi mklă krĭng pla, dŭm mta boh kroh mơ̆ng čar dưi ba čhĭ leh kơ ala tač êngao hŏng klei jăk găl truh kơ dŭm ala čar hŏng hnơ̆ng lu, mâo boh tŭ yuôm lehanăn ba wĭt hnư hrui wĭt đĭ hĭn kơ mnuih ƀuôn sang. Jing čar mâo hdră duh mkra hŏng bruă lŏ hma jing klei găl, Dak Nông dôk mđing mđĭ hĭn hdră bi hgŭm kluôm lehanăn dŭm krĭng pla srăng mâo mrô bi mklă: “Čiăng dưi mkŏ mkra krĭng pla snăn bi mguôp hŏng anăn jing brei mkŏ mjing hdră bi hgŭm kluôm, mjing krĭng pla mjing lehanăn rơ̆ng hnơ̆ng tŭ jăk čiăng bi mklă phŭn agha anôk pla mjing. Klei tŭ yuôm mơ̆ng krĭng pla jing pô srăng thâo ana anei, mnơ̆ng anei ti anôk pla, hlei pô dôk ngă bruă lehanăn hluê si hdră pla mjing, rơ̆ng klei doh êƀăt mơ̆ amâo dah h’aĭ. Ti alŭ wăl čar, snăn mơ̆ng bruă Đảng čar truh kơ anôk bruă sang čư̆ êa čar mâo leh lu klei gĭt gai kơ bruă anei. Hlăm bruă mkŏ dăp hdră ngă lŏ hma ăt bi mklă ba hdră bi hgŭm kluôm hlăm klei ngă bruă kñăm mjing krĭng pla mjing h’ĭt kjăp, mkăp kơ bruă mkra mjing ăt msĕ mơh ba čhĭ kơ êdei anăp.

Krĭng pla mâo mrô bi mklă hŏng hdră pla mjing rơ̆ng hnơ̆ng tŭ jăk dôk ba wĭt klei tŭ dưn kơ mnuih ƀuôn sang ngă lŏ hma lehanăn dŭm anôk bruă duh mkra ba čhĭ mnơ̆ng kơ ala tač êngao ti lăn dap kngư. Bruă anei hlăk mâo dŭm alŭ wăl hlăm krĭng mđing mđĭ kyar čiăng dưi ba dŭm pla mnơ̆ng lŏ hma phŭn truh kơ wăl anôk blei mnia tar rŏng lăn./.