Êlâo dih, kdrêč găn mơ̆ng kban Nước Lương truh alŭ T6, să Đak Mang, kdriêk Hoài Ân, čar Bình Định điêt snăk. Hlăm yan hjan, lu anôk hlăm kdrêč êlan anei êngăp êa, mnuih ƀuôn sang găn êrô dleh dlan. Mơ̆ng prăk hdră bruă 4 kơ klei bi liê anôk bruă nah gŭ hlăm Hdră kñăm ala čar mđĭ kyar bruă duh mkra ala ƀuôn krĭng mnuih djuê ƀiă, čư̆ čhiăng, Knơ̆ng bruă sang čư̆ êa kdriêk Hoài Ân, čar Bình Định bi liê 2,5 êklai prăk čiăng mđĭ, pŏk mlar êlan mơ̆ng kban Nước Lương truh alŭ T6 leh anăn bê tông êlan mlir krĭng alŭ hlăm să Đăk Mang. Đinh Văn Thanh, mnuih ƀuôn sang să Đak Mang, kdriêk Hoài Ân brei thâo, êlan mrâo dưi mkra mđĭ, pŏk mlar đru kơ bruă găn êrô, dŭ mdiăng mnơ̆ng dhơ̆ng găl ênưih hĭn:

 “Êlan bê tông dưi mkra mrâo đru kơ mnuih ƀuôn sang mdiăng mdiê mơ̆ng dŭm kdrăn lŏ wĭt kơ sang mnuih ƀuôn sang. Êlan mrâo đru kơ mnuih ƀuôn sang êrô êbat êđăp ênang mă hŏng dŭm thŭn êlâo”

Kdrêk Hoài Ân bi mklă bi liê hdră bruă êlan klông jing boh kdrŭt yuôm bhăn, đru mđĭ kyar bruă duh mkra- ala ƀuôn krĭng dleh dlan, krĭng taih kbưi. Dŭm krĭng hdră bruă găn, mnuih ƀuôn sang tŭ ư ruh mgaih anôk ala. Nguyễn Xuân Phong, K’iăng Khua Knơ̆ng bruă sang čư̆ êa kdriêk Hoài Ân, čar Bình Định brei thâo, alŭ wăl dôk bi mguôp dŭm hdră kñăm ala čar, mđĭ lar klei găl alŭ wăl mkŏ mjing mkra mjing hlue si hdră ênoh yuôm leh anăn pŏk mlar, mđĭ bi hgŭm hdră yuôm hŏng bruă ba čhĭ mnơ̆ng dhơ̆ng.

 “Pŏk ngă hdră bruă mđĭ kyar mkra mjing kơ krĭng mnuih djuê ƀiă, đru gru hmô, ana mjeh leh anăn kdrăp kơ mnuih ƀuôn sang yua hdră mnêč kreh knhâo mrâo mrang. Dŭm gru hmô pla mjing ba prăk hrui wĭt kơ bruă duh mkra lu hĭn kơ krĭng mnuih djuê ƀiă čiăng mjing klei mĭn leh anăn klei thâo săng hlăm bruă mđĭ hnơ̆ng jăk mnơ̆ng dhơ̆ng lŏ hma hlăm grăp ênhă leh anăn grăp mta mnơ̆ng dhơ̆ng. Mơ̆ng anăn, mđĭ prăk hrui wĭt, mđĭ kyar bruă duh mkra gŏ sang, bi hrŏ ênoh gŏ êsei ƀun ti alŭ wăl”.

Thŭn 2024, hdră kčah prăk bi liê hlue ngă Hdră kñăm ala čar mđĭ kyar bruă duh mkra ala ƀuôn krĭng mnuih djuê ƀiă leh anăn čư̆ čhiăng čar Bình Định êbeh 412 êklai prăk. Truh hruê 31/5, dŭm alŭ wăl čar Bình Định bi liê êbeh 50,7 êklai prăk, mâo 12,3%. Hdră pŏk ngă dŭm hdră bruă điêt hlăm Hdră anei ăt adôk mâo lu klei dleh dlan. Knơ̆ng bruă sang čư̆ êa čar Bình Định lŏ dơ̆ng mđĭ lar dŭm Êpul bruă mlir dhar bruă mơ̆ng čar ksiêm dlăng, ktuê dlăng boh sĭt hlue ngă leh anăn ktrâo lač, ruh mgaih klei gun kpăk, dleh dlan hlăm hdră pŏk ngă dŭm hdră kñăm ala čar. Đinh Văn Lung, Khua Anôk bruă djuê ana čar Bình Định brei thâo, anôk bruă mtă kơ dŭm alŭ wăl mđing hlăm bruă hâo hưn mtô mblang, mđĭ bruă hlue ngă hdră bruă mơ̆ng hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng:

 “Lu hdră êlan, kyua anăn jing ngă bruă hâo hưn mtô mblang brei păn kjăp. Tal dua brei lu êpul bruă, lu dhar bruă djŏ tuôm kơ dŭm bruă klam añei čiăng hâo hưn kơ mnuih ƀuôn sang thâo săng.  Hdră lu gưl bruă Đảng ăt mâo leh klei ngă bruă jăk, đua klam hĭn hlăm bruă hâo hưn mtô mblang čiăng kơ mnuih ƀuôn sang dưi dưn hdră anei, đru kơ klei hdĭp mda jăk hĭn”./.