Thŭn 2018, Binh đoàn 15 leh anăn Êpul gĭt gai mkŏ mjing bruă kđi čar nah gŭ leh anăn mđĭ kyar krĭng ƀuôn sang (Phŭn bruă lĭng kahan Lào) mkŏ mjing leh knăn siñê hră bi mguôp mjĕ mjuk. Dua anôk bruă bi mguôp mkŏ mjing lu klei čuă dlăng, hluê hriăm, kah mbha klei hriăm kơ dŭm klei bi hmô bruă lŏ hma – mnơ̆ng hlăm dliê, mtô mjuăt bi hriăm, bruă mdrao mgŭn nao mbĭt hŏng bruă răng mgang klei êđăp ênang.

Bi mguôp ksiêm dlăng dŭm klei găl ti čar Xay Sổm Bun leh anăn Xiêng Khoảng mjing tur knơ̆ng đru kơ ala čar găp hluê ngă dŭm hdră êlan, Binh đoàn 15 đru leh kơ bruă tui duah đru dŏng, mbĕ đuê̆ dŭm êtuh gŏ sang nao ti anôk êđăp ênang, bi mguôp mkŏ mjing bruă mkă dlăng mdrao klei ruă, mbha êa drao amâo mâo mă prăk kơ dŭm êbâo gưl čô. Čih yap dŭm klei đru mguôp, Phŭn bruă lĭng kahan Lào mđup brei leh hla čhiăm gru klei dưi leh anăn mêđai jhŏng ktang mrô II, III kơ dŭm êpul êya, grăp čô hlăm Binh đoàn 15.