VOV4.Êđê- Gru hmô “Bi mguôp gŏ êsei mnuih mă bruă djuê lar hŏng gŏ êsei mnuih djuê ƀiă ti alŭ wăl” mâo Binh Đoàn 15 pŏk ngă ba leh klei tŭ dưn klă sĭt. Mơ̆ng hdră bi mjĕ mjing, dŭm gŏ êsei phung mă bruă djuê lar đru leh mnuih djuê ƀiă ti Gia Lai bi mlih klei thâo săng hlăm hdră mđĭ kyar bruă duh mkra, msir klei ư̆ êpa, bi hrŏ klei ƀun knap, đru mđĭ klei bi hgŭm jih jang ƀuôn sang.

 Amai Nguyễn Thị Kim Thanh, dôk ti êpul mrô 4, knơ̆ng bruă Bình Dương, hlăm Binh Đoàn 15 jing sa hlăm dŭm gŏ sang thâo bi hmô jăk hlăm bruă "Bi mguôp dŭm gŏ sang mnuih ngă bruă jing djuê lar hŏng mnuih ngă bruă mnuih djuê ƀiă ti alŭ wăl". Ñu đru leh gŏ sang amai Kpuih Bler, mnuih djuê ana Jrai ngă bruă mbĭt, dôk ti să Ia Tô, kdriêk Čư̆ Prông, čar Gialai. Êlâo dih Kpuih Bler dôk hlăm klei dleh dlan, mâo mơh lăn hma, ƀiădah lui êruh, knŏng buh pla mă ƀiă mdiê ktơr. Kyuanăn khădah dua ung mô̆, aguah kơ hma êla kơ bruă dưn, jih thŭn êngŭn mlan ăt kplŭt aguah kƀah tlam, amâo mâo djăp êsei huă djam ƀơ̆ng mnơ̆ng čŭt hơô. Ƀiădah mơ̆ng leh mâo amai Thanh ngă klei bi đru, mâo klei ktrâo atăt jih ai tiê, snăn klei hdĭp mda amai Bler dơ̆ng bi mlih. Truh kơ ară anei, gŏ sang Kpuih Bler mâo leh êbeh 3 ha kñŭl, kphê, mâo boh mnga hơĭt. Gŏ sang amâo mâo djŏ knŏng djăp êsei huă djam ƀơ̆ng, ƀiădah lŏ mâo mnơ̆ng pioh. Kpuih Bler – mă bruă ti êpul mrô 4, knơ̆ng bruă Bình Dương, hlăm Binh đoàn 15 lač; 

Grăp blư̆ djiu djuăm duam ruă kyua mâo amai adei bi đru, mklăk hŏng anăn msĕ mơh mâo amai adei mkăn ruă duam snăn pô nao bi đru dlăng ba. Snăn amai adei hdĭp mda thâo bi đru dlăng ba mbĭt.

Nguyễn Thị Kim Thanh (ao mtah) hŏng Kpuih Bler - êpul 4, Knŏng brưa Bình Dương, Binh Đoàn 15 đru hdră mnêč pla mjing mđĭ kyar bruă duh mkra

            Bi amai Nguyễn Thị Kim Thanh mă bruă ti êpul mrô 4, knơ̆ng bruă Bình Dương, Binh Đoàn 15 lač, bruă đru amai Bler jing klei mơak hŏng ñu. Amai Thanh yăl dliê hlăk mrâo truh ti să Ia Tô mkŏ mkra klei hdĭp mrâo, klei hdĭp gŏ sang ñu tuôm hŏng lu klei dleh dlan, kyua mâo klei thâo bi đru, bi dlăng ba mơ̆ng phung ƀuôn sang yơh, snăn gŏ sang amai Thanh dưi mâo hĕ klei hdĭp msĕ si ară anei. Kyuanăn, bruă lŏ bi đru kơ phung ƀuôn sang, hlăm anăn mâo amai Kpuih Bler ăt jing kyua klei khăp mơh:

“Ktrâo atăt hdơ̆ng găp hlăm klei duh ƀơ̆ng, si klei khăt adhan, lah kƀiêng, krih êa čiăng bi djŏ, ktrâo pla djam mtam doh, duah ƀơ̆ng. Đru bi mđĭ ai hdơ̆ng găp, amâo mâo djŏ knŏng hlăm klei duh ƀơ̆ng ôh, ƀiădah hŏng ai tiê klei khăp tuôm hŏng klei djiu duam ăt bi dlăng ba, lehanăn gŏ sang Bler jing anôk kâo jưh knang mơh”.

        Ngă klei bi đru plah wah dŭm gŏ sang mnuih ngă bruă jing mnuih djuê lar hŏng mnuih ngă bruă jing mnuih djuê ƀiă” mâo Binh đoàn 15 mkŏ mjing mơ̆ng hlăk thŭn 2006. Mơ̆ng 30 hlâo bi mguôp phŭn tal êlâo, truh kơ ară anei êpul bruă mâo bi lar êbeh 4 êbâo hlâo gŏ sang, hlăm anăn hlăm brô 2 êbâo hlâo gŏ sang mnuih djuê ƀiă. Klei bi mguôp anei mjing klei jĕ giăm, klei sĭt suôr, bi thâo săng hdơ̆ng găp hĭn, lehanăn mâo klei thâo bi kah êsei brei djam, bi đru êjai găn klei dleh dlan, bi đru hlăm klei duh ƀơ̆ng mđĭ kyar klei hdĭp mda.

Dŭm hlâo gŏ sang mâo klei bi mguôp dưi bi klă leh leh bruă Binh đoàn mtrŭt mjhar klei bi đru anei jing yuôm bhăn êjai dôk mă bruă, plah wah mnuih ngă bruă hŏng phung ƀuôn sang, knư̆ hrue knư̆ mâo klei bi mguôp sĭt suôr hĭn. Thượng tá Khuất Bá Cao - Khua bruă Đảng Binh đoàn 15 brei thâo:

“Mơ̆ng bruă ngă klei bi mguôp gŏ sang msĕ snăn, hlăm dŭm thŭn giăm anei, mâo đru mguôp leh yuôm bhăn kơ bruă čiăng bi hơĭt lehanăn mđĭ kyar anôk bruă. Lehanăn đru hŏng dŭm gưl bruă Đảng, bruă sang čư̆ êa alŭ wăl, dŭm êpul êya hlăm alŭ wăl bi răng kriê klei êđăp ênang bruă kđi čar lehanăn yang ƀuôn krĭng ƀuôn sang. Dŭm gŏ sang mnuih djuê ƀiă amâo mâo djŏ knŏng tlaih mơ̆ng klei dleh dlan, ƀiădah lŏ kpưn đĭ kơ mdrŏng sah, mâo leh lu hlâo gŏ sang bi mguôp truh kơ ară anei mâo ba wĭt leh mơ̆ng 200 – 300 êklăk prăk/thŭn”.

            Boh tŭ dưn mơ̆ng klei bi hmô “klei bi mguôp gŏ sang” bi đru hdơ̆ng găp mđĭ kyar klei hdĭp mda mơ̆ng Binh đoàn 15 mjing leh gru mngač kơ klei duh mkra, dhar kreh, yang ƀuôn, lehanăn bruă răng mgang klei êđăp ênang. Mơ̆ng anăn mjing leh klei đăo knang, mâo klei siă suôr hĭn plah wah dŭm gưl bruă Đảng, bruă sang čư̆ êa, lehanăn phung ƀuôn sang hlăm alŭ wăl./.

Pô mblang: Y-Khem Niê