VOV4.Êđê - Lâm Đồng jing alŭ wăl hing ang kơ bruă ba yua kdrăp mrâo hlăm bruă lŏ hma. Hlăm wưng êgao, mnuih ƀuôn sang djuê ƀiă ăt jhŏng duh bi liê prăk, yua kdrăp mrâo čiăng mkra mjing djam mtam, mnga ba ênoh yuôm kơ bruă duh mkra. Ti să Phi Tô, kdriêk Lâm Hà, êlâo adih mnuih ƀuôn sang knŏng pla kphê, jih thŭn kơh mâo prăk hrui wĭt, ƀiădah ară anei mâo leh lu gru hmô pla lagim mâo prăk hrui wĭt grăp thŭn. Hlăm anăn, gŏ sang amai Ka Lương, djuê ana K’Ho, ti alŭ Phi Sour, să Phi Tô jing sa klei êdah kdlưn.

Klei siam êdi tal êlâo dưi ƀuh tơdah truh ti alŭ Phi Sour, să Phi Tôn, kdriêk Lâm Hà, čar Lâm Đồng jing mâo lu sang prŏng siam, djiêu gah jing đang kphê, sang ală kĭng, sang ñuăl. Gŏ sang amai Ka Lương, mnuih djuê ana K’ho Srê, ti djiêu êlan dơ̆ng prŏng. Ti tluôn sang prŏng siam jing sa boh sang prŏng 700 m2, mâo kdrăp krih êa, čŏng pruê hbâo. Anei jing gru hmô pla lagim (dŭm mta djam mtam – boh kroh) hlăm sang ală krĭng ti alŭ Phi Sour, să Phi Tôn. Amai Ka Lương brei thâo, leh čhĭ kphê, gŏ sang ñu duh giăm 500 êklăk prăk mlra sang ală kĭng. Bi prăk duh pla mjing tal êlâo jing prăk ñu čan 30 êklăk mơ̆ng Knơ̆ng prăk đru ba yang ƀuôn kdriêk Lâm Hà. Leh yan lagim tal êlâo, ƀuh tŭ dưn, ñu lŏ čan 20 êklăk prăk pla 4 sao boh ksu lehanăn dŭm mta djam mtam boh kroh. Amai Ka Lương lač, mnuih ƀuôn sang tinei juăt mưng leh hŏng ana kphê, leh pla hluê hdră lagim, ƀuh anei jing hdră ngă mrâo, brei thâo klă kơ hdră mnêč. “Kơ hdră mnêč dlăng kriê kâo čŏng pô tui ksiêm, kyua ti alŭ wăl, Êpul hgŭm bruă mniê să ka pŏk ngă gru hmô anei kyua anăn kâo nao truh ti Đơn Dương tui hriăm klei thâo, hluê ayŏng adei mnuih djuê lar ksiêm dlăng si diñu dlăng kriê, ya mjeh yua čiăng pô wĭt hluê ngă.

Pla lagim hlăm sang ală kĭng jing sa hdră mrâo, mdê mkă hŏng hdră pla kphê. Amai Ka Lương brei thâo, pô hnêč mơ̆ng aguah ưm amâo dah krah yang hruê, mmăt dlăng kriê. Pla lagim čiăng êdi klei kriăng, boh nik hdră gang mkhư̆ mnơ̆ng ngă. Mnơ̆ng gŏ sang kâo pla mâo phung ghan mnia nao blei ti sang, hŏng ênoh h’ĭt lehanăn yuôm hĭn. Knŏng tĭng prăk hrui mâo mơ̆ng 700 m2 sang ală kĭng pla djam mtam, boh kroh, grăp mlan amai mâo prăk mnga êbeh 10 êklăk prăk. Anei jing hnư hrui wĭt yuôm bhăn, rơ̆ng prăk yua hlăm klei hdĭp aguah tlam. Êngao anăn, gŏ sang amai lŏ mâo 5 sao kphê, rông mnơ̆ng lehanăn pla mdiê. Hluê amai Ka Lương, bruă pla lagim hlăm sang ală kĭng jing hdră êlan mrâo hlăm bruă pla mjing ti gŏ sang. “Êlâo adih, mnuih djuê ƀiă mưng hŏng hdră pla mjing mơ̆ng đưm êlâo. Leh anăn mnuih K’ho ăt snăn, kreh jưh knang kơ kphê, sa thŭn hrui êmiêt sa blư̆, djăp prăk bi liê hlăm gŏ sang, anak aneh nao sang hră hiu duah čan s’aĭ. Knhal jih yan, hrui amâo djăp tla nư, khădah kphê truh dŭm ha. Leh kơnăn, kâo hiu mă bruă mưn kơ ayŏng adei mnuih djuê lar, hmư̆ diñu lač knŏng knang kơ kphê amâo dưi ôh, brei mâo klei bi mlih, lông pla lagim, kyua lagim srăng mâo hnư hrui wĭt hĭn mkă hŏng kphê. Khădah lagim grăp blư̆ hrui mâo ƀiă, ƀiădah hlăm mlan hrui lu blư̆.

Dŭm thŭn êgao, Êpul bruă mniê dŭm gưl ti Lâm Hà mtrŭt mjhar leh phung amai adei jhŏng ba yua kdrăp mrâo hlăm bruă pla mjing, rông mnơ̆ng ba wĭt klei tŭ dưn. Êpul bruă mniê dŭm gưl ti Lâm Hà ba yua leh phŭn mkăp prăk čan đru phung mniê mđĭ kyar bruă duh mkra, ƀrư̆ ƀrư̆ bi hrŏ ƀun ti alŭ wăl. Truh ară anei, Êpul bruă mniê kdriêk Lâm Hà bi hgŭm hŏng Knơ̆ng prăk đru ba yang ƀuôn, Knơ̆ng prăk Lŏ hma mđĭ kyar krĭng ƀuôn sang đru kơ phung mniê ba yua tŭ dưn prăk čan. Mơ̆ng anăn, mâo êbeh 5 êbâo čô dưi čan prăk êbeh 140 êklai prăk. Amai Ka Soanh, Khua êpul bruă mniê să Phi Tô, kdriêk Lâm Hà brei thâo, dŭm thŭn êgao, ti alŭ wăl mâo lu klei bi mlih hlăm hdră pla mjing, boh nik hŏng phung mniê djuê ƀiă, msĕ si gŏ sang amai Ka Lương: “Ka Lương jing mnuih djuê ana K’ho hlăm Êpul bruă mniê, jing sa čô mâo klei gĭr hlăm klei hdĭp, jhŏng mĭn jhŏng ngă, gĭr tui ksiêm čiăng mđĭ kyar bruă duh mkra. Amai jing sa čô êdah êdi. Kâo čang hmăng jih jang amai adei mniê drei, boh nik mnuih djuê ƀiă srăng hluê gru mngač mđĭ kyar bruă duh mkra mơ̆ng amai Ka Lương đru mđĭ kyar bruă duh mkra ti alŭ wăl.

Klei hdĭp mnuih djuê ƀiă ti kdriêk Lâm Hà, čar Lâm Đồng mâo leh lu klei bi mlih. Mbĭt hŏng klei gĭr mơ̆ng grăp gŏ sang, lŏ mâo klei đru mơ̆ng anôk bruă duh mkra lehanăn anôk bruă djŏ tuôm, boh nik mkăp prăk čan mđĭ kyar bruă duh mkra. Mrâo anei, mlan 8 leh êgao, Anôk bruă sang čư̆ êa kdriêk Lâm Hà bi mklă êbeh 800 gŏ êsei mnuih djuê ƀiă dưi čan prăk hŏng ênoh prăk mnga hdjul čiăng bi mlih bruă ngă. Knŏng ti să Phi Tô mâo giăm 100 gŏ êsei, grăp gŏ êsei dưi čan 100 êklăk prăk. Anei jing phŭn mkăp prăk čan yuôm bhăn, đru kơ mnuih djuê ƀiă duh bi liê kơ bruă tŭ dưn hĭn hlăm wưng ti anăp./.

H’Nêčpô mblang