Ngă klei bi ktưn mđrăm mbĭt đru bi mkŏ mkra krĭng ƀuôn sang mrâo, hrăm mbĭt kyua mnuih ƀun, 5 thŭn êgao, lĭng kahan yang ƀuôn čar Daklak mâo tiŏ nao leh êbeh 2.300 gưl čô kahan hŏng giăm 20.000 hrue ai mă bruă nao đru leh mnuih ƀuôn sang hlăm krĭng dleh dlan. Iêô mkrum mâo êbeh 1 êklai prăk kơ dŭm gŏ êsei knŭk kna dlăng ba, blei mjeh mnơ̆ng pla, mjeh mnơ̆ng rông, kdrăp duh ƀơ̆ng kơ dŭm gŏ êsei ƀun. Hlăm wưng dôk gan klei ruă tưp Covid-19, lĭng kahan yang ƀuôn čar bi mguôp leh hŏng dŭm anôk bruă, êpul bruă kđi čar, lehanăn yang ƀuôn iêô mkrum mâo êbeh 3 êklai prăk pioh đru kơ mnuih ƀuôn sang dôk găn hlăm klei dleh dlan, hŏng lu bruă ngă mâo leh klei tŭ dưn.

Nao lehanăn blŭ hrăm hlăm anôk bi kƀĭn, Trung tướng Thái Đại Ngọc, Khua knơ̆ng kiă kriê kahan alŭ wăl 5 bi mni kơ dŭm bruă bi ktưn mơ̆ng lĭng kahan čar Daklak hlăm 5 thŭn êgao. Dŭm thŭn tinăp, êjai boh klei dlông rŏng lăn, lehanăn hlăm alŭ wăl dôk găn jing bŏ hŏng klei dleh dlan, amâo dưi thâo tĭng êlâo, snăn hlăm alŭ wăl kahan boh nik jing hlăm krĭng Lăn dap Kngư drei ăt dôk jing sa krĭng amâo mâo hơĭt sĭt ôh. Knơ̆ng khua kiă kriê kahan alŭ wăl - Êpul gơ̆ng bruă bi ktưn lehanăn pah mni, knơ̆ng bruă kiă kriê kahan čar Daklak mđing gĭt gai, kiă kriê bi jăk djăp mta bruă:

 “Păn kjăp klei mĭn mơ̆ng Khua gĭt gai Hồ Chí Minh kơ klei bi ktưn khăp kơ lăn čar, msĕ si “Ngă mtam 5 klei kut kat, 5 klei čŏng ngă” tui si klei ayang khua gĭt gai Nguyễn Phú Trọng mtă leh; jih jang hră mơar dôk hlăm hdră bhiăn, ngă bruă bi ktưn, pah mni lehanăn bi lông tui mă klei dưi, anăn yơh jing bruă mơ̆ng bruă cách mạng mơ̆ng "Lĭng kahan Awa Hồ", klei kdloh ƀrŏng kdlưn hĭn mơ̆ng lĭng kahan yang Việt Nam.”.

Tai Daknông, 5 thŭn êgao, klei bi lông tui tiŏ klei dưi mơ̆ng lĭng kahan yang ƀuôn čar mâo mjing leh boh kdrŭt jăk snăk, mssĭ ai ktang hlăm klei bi blah, đru bi leh dŭm mta čuăn kơ bruă duh mkra ala ƀuôn. Hlăm 5 thŭn, mâo leh dŭm pluh êbâo gưl phung knuă druh, lĭng kahan nao đru mnuih ƀuôn sang dôk hlăm klei dleh dlan, iêo mkrum mâo êbeh 5,6 êklai prăk, rŭ mdơ̆ng truh 78 boh sang bi đru; mâo đru leh 1,4 êklai prăk kơ dŭm gŏ êsei ƀun kpưn đĭ tlaih mơ̆ng klei dleh dlan, đru hlăm klei mkă dlăng mdrao mgŭn amâo mâo prăk ôh hŏng 1.900 čô mnuih ti krĭng taih kbưi.

Hlăm wưng thŭn 2019 - 2024 kluôm čar mâo hrŏng ruah lehanăn hưn mthâo  truh 67 êpul, 82 čô mnuih jing kdlưn hĭn hlăm djăp mta bruă. Hlăm 5 êgao, mâo leh 31 gưl êpul mâo leh Phŭn bruă lĭng kahan, lehanăn kahan alŭ wăl 5 tŭ yap jing êpul êya djăp klei ktang kluôm dhuôm hŏng klei hur har lehanăn thâo bi hmô.

Ti Anôk bi kƀĭn, Trung tướng Thái Đại Ngọc, Khua knơ̆ng kiă kriê kahan alŭ wăl 5 bi mni kơ lĭng kahan čar Daknông mâo leh klei thâo bi mguôp, hŏng klei mbruă ngă klei bi ktưn, čiăng mâo ba wĭt klei dưi. Hŏng boh klei mrâo ară anei, Trung tướng Thái Đại Ngọc mtă kơ êpul khua bruă Đảng kahan, Knơ̆ng kiă kriê kahan čar Daknông lŏ dơ̆ng păn kjăp klei mĭng khua gĭt gai Hồ Chí Minh hlăm klei bi ktưn khăp čiăng kơ lăn čar:

“Kăp mđing thâo ƀuh, bi hriăm mbŏ, hâo hưn pŏk mlar, hdră mă bruă hŏng klei knhêč, tŭ dưn, klei thâo bi hmô jăk mơ̆ng dŭm êpul, lehanăn mnuih jing kdloh ƀrŏng hĭn, tŭ jing hĭn. Dŭm klei kdlưn hĭn anăn mơ̆ng dŭm êpul, lehanăn lĭng kahan mâo ngă leh kñăm mghaih msir jih jang klei dleh dlan, thâodah ya mta bruă jing dleh ktrŏ hŏng lu mnuih ka tuôm ngă, ka jhŏng ngă, ƀiădah mâo hĕ leh klei mĭn jhŏng ngă, ba klei knhêč hŏng bruă knuă. Snăn klei bi ktưn anei jing mđrĭng hŏng klei pah mni, bi hmao bi djŏ, hŏng phung mâo klei năng”.

Mơ̆ng klei bi kƀĭn prŏng bruă bi ktưn tui tiŏ klei dưi mơ̆ng lĭng kahan yang ƀuôn wưng thŭn 2019-2024 lŏ sa blư̆ dơ̆ng brei ƀuh, phung knuă druh, lĭng kahan dŭm boh čar Daklak, Daknông, khădah hŏng si klei jing, bruă ngă, ƀiădah mâo nanao ai tiê cách mạng, ba êlan êlâo hŏng klei bhiăn kjăp, hur har, bi kdơ̆ng hŏng klei amâo mâo jăk. Knư̆ dôk hlăm klei dleh dlan, snăn lĭng kahan yang ƀuôn knư̆ hĭn mơh mâo ai tiê thâo bi ktưn, mlih mrâo, ngă bruă hŏng klei knhêč hlăm klei bi blah, hlăm klei mă bruă, hlăm klei duh mkra mơ̆ng lĭng kahan yang ƀuôn Việt Nam.