Hluê si klei hưn, wưng thŭn 2021–2025, kluôm čar Dak Lak mâo 2.460 hdră bruă ba yua ngăn prăk knŭk kna, hlăm anăn mâo 1.579 hdră ka dưi ksiêm dlăng; 141 hdră bruă tuôm hŏng klei dleh dlan, gun kpăk, êmưt hluê ngă. Lương Nguyễn Minh Triết, Khua bruă Đảng čar Dak lak mtă brei ksiêm dlăng kluôm, bi mklă dŭm hdră bruă dôk ksŭn, kpăk đuôm êlâo kơ hruê 15/5, mbĭt anăn bi mklă klei đua klam mơ̆ng grăp êpul, mnuih, mguôp hŏng hdră tĭng dlăng boh tŭ ngă bruă mơ̆ng grăp čô knuă druh.

Čar Dak Lak srăng mkŏ mjing dŭm êpul ngă bruă mâo phung khua kiă kriê Anôk bruă sang čư̆ êa čar nao ksiêm dlăng, ruh mtlaih klei dleh mơ̆ng grăp hdră bruă, rơ̆ng amâo mâo mđĭ mđăl, msir mghaih jih klei dôk mâo. Bruă msir mghaih brei bi mguôp hŏng hdră ksiêm dlăng, bi mklă klei dleh, klei soh čhuai, mđing kơ bruă ruh mtlaih dŭm klei gun kpăk hlăm hdră ngă bruă./.