Klei năng mđing jing êlan êdeh treng êran pral Dưr - Dhŭng găn čar hŏng boh taih giăm 192 km. Čiăng duh kơ bruă ruh mgaih anôk ala, čar Khánh Hòa miĭn tĭng mkŏ mjing 31 wăl anôk dôk mrâo, mâo 13 wăl sa anôk leh anăn 18 wăl rŭ mdơ̆ng mrâo amâodah pŏk mlar, hŏng ênoh bi liê êbeh 1.700 êklai prăk.

Khădah snăn, hŏng hdră bruă anei, lu hdră bruă mkăn ti alŭ wăl ăt dôk tuôm hŏng lu klei dleh dlan kơ hră mơar leh anăn dŭm knhuang pŏk ngă. Hlăk êjai anăn, êpul knuă druh hlue ngă bruă klam ti nah gŭ adôk kƀah leh anăn ka ngă djŏ klei čiăng. Ti anăp boh klei anei, čar ba nao leh 78 čô knuă druh gưl čar đru kơ alŭ wăl, mbĭt anăn brei siñê hră kuôl kă hŏng dŭm anôk bruă knŭk kna tơdah kƀah mnuih mă bruă, kñăm mđĭ hnơ̆ng ruh mgaih anôk ala.