Blŭ hrăm hlăm klei kƀĭn, Khua Knŭk kna Lê Minh Hưng mnă ktang klei mjĕ giăm Việt Nam - Dhŭng Korea ară anei amâodjŏ knŏng mdei hlăm klei bi mguôp bruă mnia mblei amâodah duh bi liê ƀiădah bi mlih hlăm wưng dlông hĭn, wưng bi mguôp hdră êlan kluôm dhuom, hrăm mbĭt nao hgŭm leh anăn mkŏ mjing dŭm boh tŭ dưn mrâo ti alŭ wăl leh anăn tar rŏng lăn.

Khua Knŭk kna hmăng hmưi dŭm knơ̆ng bruă dua ala čar srăng bi trông kpă, bi êdah klă klơ̆ng, mbĭnt hŏng Knŭk kna dua ala čar ruah mgaih klei kpăk leh anăn pŏk mlar dŭm hdră êlan bi mguôp mrâo. Khua Mil Čhil Dhŭng Korea Lee Jae Myung bi êdah, êjai klei amâo mâo hơĭt mơ̆ng bruă duh mkra tar rŏng lăn dôk đĭ ktang, bi mguôp bruă duh mkra dua ala čar Dhŭng Korea leh anăn Việt Nam lŏ yuôm bhăn hĭn, hrăm mbĭt bi kluôm wăl anôk bruă tuh tia êdei anăp, mkŏ mjing klei bi kƀĭn kơ boh kdrŭt đĭ kyar. Klei mnia mblei dua ala čar thŭn 2025 mâo 94,6 êklai USD,  Khua Mil Čhil đăo knang lŏ dơ̆ng pŏk mlar hnơ̆ng klei mnia mblei, duh bi liê leh anăn dưi mâo mta kñăm mrâo jing 150 êklai USD hlăm thŭn 2030.