Yan không 2025 – 2026 mrâo êgao, bruă tui duah, bi klin klang phung êngiă asei ba anăp leh anăn phung thơ̆ng kơ bruă Việt Nam săn asei ti Campuchia hlăm dŭm gưl ênuk bi blah mâo dua tĭng bi hgŭm gĭt gai pŏk ngă djăp ênŭm hlue si Hră bi hdơr siñê grăp thŭn. Bruă bi hgŭm, bi trông, msir mgaih dŭm bruă djŏ tuôm dưi ngă kjăp.

Hŏng klei gĭr nanao mơ̆ng Êpul K51 (Anôk bruă gĭt gai lĭng kahan čar Dak Lak) leh anăn klei mđing uêñ, đru mơ̆ng bruă sang čư̆ êa leh anăn dŭm anôk  bruă djŏ tuôm čar Mondulkiri mđĭ ktang bruă hâo hưn, mkăp klei hâo hưn, pŏk ngă êpul đru ti dŭm alŭ wăl, truh ară anei mâo leh 22 klang phung êngiă asei Việt Nam (ka bi mklă anăn djuê). Dua Anôk bruă thơ̆ng bi trông, sa anăn bruă mkŏ mjing Knăm ba jao leh anăn ba klang phung êngiă asei kơ čar Dak Lak mĭn tĭng mkŏ mjing hruê 27/5, hlue si klei bhiăn mơ̆ng Campuchia. Dua tĭng ăt tŭ ư dŭm boh phŭn djŏ tuôm kơ bruă tui duah, bi klin msat phung êngiă asei hlăm wưng kơ anăp./.