Hluê ngă klei mtô mơ̆ng Êpul bruă hâo hưn gưl dlông, tlam mbruê 24/4, ti ƀuôn prŏng Kon Tum, Êpul khua bruă Đảng čar Kon Tum mkŏ mjing klei kƀĭn trông klă anăp bi mguôp hŏng online mkŏ hŏng 12 anôk bi kƀĭn hlăm čar kñăm hyuă kjăp, klei hluê klei čih tui hriăm leh anăn hluê ngă klei mĭn, knhuah hdĭp, knuih hdĭp khua gĭt gai Hồ Chí Minh thŭn 2023 leh anăn klei kƀĭn bruă kđi čar, klei mĭn mơ̆ng klei čih mơ̆ng Khua gĭt gai Đảng Nguyễn Phú Trọng.

Hlăm klei kƀĭn trông, phung hưn mdah mơ̆ng čar Kon Tum hâo hưn leh dŭm mta phŭn mơ̆ng klei čih “Ktang phĭt, gĭt ktưn hlăm bruă gang mkhư̆ klei ƀơ̆ng ngăn, klei amâo mâo jăk hlăm bruă mkŏ mjing Đảng leh anăn knŭk kna drei ƀrư̆ hruê ƀrư̆ ênuah ênô, kjăp ktang” mơ̆ng Khua gĭt gai Đảng Nguyễn Phú Trọng. Anei jing klei čoh mâo boh tŭ hlăm mblang leh anăn boh sĭt yuôm bhăn hŏng bruă mkŏ mjing Đảng, bruă kđi čar leh anăn bruă cách mạng mơ̆ng ala čar, jing klei hriăm hlăm bruă gang mkhư̆ klei ƀơ̆ng ngăn, klei amâo mâo jăk, jing boh klei phŭn mkŏ mjing Đảng leh anăn bruă kđi čar ƀrư̆ hruê ƀrư̆ ênuah ênô, kjăp ktang.