VOV4.Êđê - Aguah mbruê 14/4, ti Hà Nội, bruă Đảng êpul dŭm anôk bruă gưl dlông mkŏ mjing leh klei kƀĭn trông êpul khua kiă kriê gưl tal 8, kơ boh tŭ klei ngă bruă hlăm wưng tlâo mlan tal 1 leh anăn ba mdah dŭm mta kñăm, bruă klam hlăm wưng tlâo mlan tal 2 thŭn 2022. Hlăm klei kƀĭn, phung bi ala mâo leh klei ksiêm duah, bi trông leh anăn mâo boh blŭ kơ dŭm mta phŭn hlăm hdră mkăp hưn mdah boh tŭ 5 thŭn hluê ngă hdră mtrŭn mrô 06 mơ̆ng bruă Đảng hlăm êpul kơ bruă mđĭ hĭn klei nao êlâo, klei bi hmô mơ̆ng phung knuă druh, đảng viên, boh nik jing phung ba anăp bruă Đảng nah gŭ, anôk bruă hlăm wưng ară anei. Hdră mkăp 5 thŭn hluê ngă hdră mtrŭn mrô 04 mơ̆ng bruă Đảng hlăm êpul kơ bruă mđĭ hĭn boh tŭ klei ngă bruă čung ba mnuih ƀuôn sang mơ̆ng bruă Đảng dŭm anôk bruă gưl dlông. Êngao kơ anăn klei mtô mjuăt bi hriăm bruă kđi čar dưi mđĭ, bruă răng mgang tur knơ̆ng klei mĭn mơ̆ng Đảng, bi kdơ̆ng hŏng dŭm klei mĭn soh čhuai, phung roh ăt dưi mtrŭt mđĭ, đru mkŏ mjing êpul bruă Đảng leh anăn bruă kđi čar hlăm êpul jing ênuah ênô, kjăp ktang.

Y-Ƀel pô mblang