VOV4.Êđê- Aguah hruê 2/3, ti să knông lăn Krông Na, kdriêk Ƀuôn Đon, bruă Đoàn čar Dak Lak lehanăn bruă Đoàn čar Lâm Đồng bi hgŭm mkŏ mjing Hdră mlan 3 knông lăn thŭn 2022 hŏng anăn “Knông lăn ala čar kâo”. Kyua hmăi mơ̆ng klei ruă tưp, hdră anei dưi mkŏ mjing khuăt hŏng lu bruă tŭ yuôm. Hdră mlan 3 knông lăn mơ̆ng phung êdam êra 2 čar Dak Lak lehanăn Lâm Đồng dưi mkŏ mjing hŏng lu bruă ngă klă sĭt, tŭ yuôm msĕ si: Hluê ngă hdră guh mngač êlan knông lăn ti Wăl knhuah gru hƀuê ênuk ala čar Kdrŭn găn êa krông Serepok, giăm kđông kahan răng mgang knông lăn Serepok jưh dôk.

Mkŏ mkra hdră krih êa mkiêt mkriêm kơ đang war phung êdam êra ti Kđông kahan răng mgang knông lăn Serepok. Mđup brei mnơ̆ng kơ phung lĭng kahan răng mgang knông lăn dôk mă bruă ti krĭng knông lăn. Mđup brei 20 hnư prăk đru hriăm hră hlăm Hdră đru kơ adei nao sang hră ti să Knông Na lehanăn mđup brei 150 blah hla čhiăm gru ala čar kơ mnuih ƀuôn sang ƀuôn Drang Phôk, să Krông Na, kdriêk Ƀuôn Đon. Ênoh prăk hluê ngă jih hdră anei êbeh 100 êklăk prăk./.

                                                    Pô mblang: H’Nêč Êñuôl