Ti să Ia Čiă, kdriêk Ia Grai, čar Gia Lai, Bruă Êdam êra  gưl dlông mđup brei leh 350 hnư mnơ̆ng kơ dŭm gŏ sang jing phung ngă bruă mâo klei hdĭp dleh dlan, hđeh jing mnuih djuê ƀiă gĭr ktưn hlăm klei hriăm hră mơar…Grăp hnư mnơ̆ng mâo ênoh 700.000 prăk, mâo prăk hla leh anăn dŭm mta mnơ̆ng yua čiăng êdi. Hŏng hdră “Tết kah mbha, thŭn anak Rai đĭ kyar”, Bruă êdam êra gưl dlông hmăng hmưi lŏ dơ̆ng bi lar knhuah gru thâo “Thâo khăp, thâo pap”, bi mguôp, kơup mgang, klei thâo bi đru mơ̆ng djuê ana. Dŭm gưl bruă Êdam êra lŏ dơ̆ng nao hgŭm hur har, mâo lu mta bruă tŭ dưn, hrăm mbĭt hŏng phung êdam êra, phung hđeh mâo klei hdĭp dleh dlan, boh nik hlăm wưng Tết Nguyên đán, đru mkŏ mjing boh kdrŭt čiăng kơ phung êdam êra, phung mă bruă lŏ dơ̆ng gĭt ktưn hlăm klei mă bruă knuă. Mă hnư mnơ̆ng mơ̆ng hdră, ayŏng Rơ Mah Ky, ti ƀuôn Kon Yô̆, să Ia Čiă, brei thâo

“Lač jăk kơ dŭm anôk bruă mâo leh klei uêñ mĭn leh anăn mđup brei hnư mnơ̆ng, jing yuôm bhăn êdi hŏng alŭ wăl, hmăng hmưi klei uêñ mĭn hĭn mơ̆ng dŭm gưl bruă, dŭm dhar bruă djŏ tuôm hŏng krĭng taih kbưi, krĭng dleh dlan hlăm kdriêk”.

Ƀri wưng anei, êpul ngă bruă mơ̆ng gưl dlông Êpul êdam êra cộng sản Hồ Chí Minh mbĭt hŏng bruă êdam êra čar Gia Lai mâo leh klei nao čuă, mđĭ ai êpul lĭng kahan knông lăn Ia Čiă, čar Gia Lai.

Gia Lai jing anôk tal 13 hlăm 25 čar, ƀuôn prŏng mâo hdră “Tết kah mbha, thŭn anak Rai đĭ kyar” găn nao hŏng 10.400 hnư mnơ̆ng Tếr srăng mđup brei kơ phung ngă bruă tŭ klei hmăi mơ̆ng klei ruă tưp, phung mă kan hdang tuôm hŏng lu klei lông dlăng kyua klei mlih yan adiê leh anăn lĭng kahan knông lăn.

Ăt hlăm hruê kăm êgao, bruă Êdam êra  gưl dlông bi mguôp hŏng bruă Êdam êra  čar Kon Tum mkŏ mjing hdră “Yan mnga knông lăn – Tết plao ksĭ” ƀri wưng  Tết Giáp Thìn 2024 ti dua kriêk Ia H’Drai leh anăn Sa Thầy.

Ti kdriêk knông lăn Ia H’Drai, čar Kon Tum, Êpul bruă êdam êra  gưl dlông mđup brei leh klei bi hmô hdră duh ƀơ̆ng mâo ênoh 2 êklai prăk đru lĭng čan prăk mnga hdjul čiăng kơ phung êdam êra, phung êdam êra hlăm alŭ wăl mđĭ kyar klei hdĭp mda, mđup brei 20 klei đru hriăm hră mơar, grăp hnư 2 êklăk prăk kơ phung hđeh sang hdră ƀun ƀin hriăm thâo, mđup brei 30 hnư mnơ̆ng kơ phung mă bruă ti knơ̆ng bruă duh mkra mnia mblei Ksu Čư̆ Mô Ray leh anăn knơ̆ng bruă duh mkra mnia mblei Ksu Sa Thầy. Ayŏng Ngô Văn Cương, Khua bruă êdam êra gưl dlông, Khua kiă kriê dhar bruă ksiêm dlăng bruă Êdam êra gưl dlông, brei thâo:

“Hŏng dŭm mta bruă anei kñăm đru kơ phung mă bruă, phung êdam êra, phung mâo klei hdĭp dleh dlan mâo klei găl dưi wĭt ƀơ̆ng tết hơuuh mđao hĭn, gŏ sang hơ̆k mơak hĭn. Leh sa wưng tết mâo lu klei găl čiăng đru kơ phung mă bruă, ăt msĕ mơh phung êdam êra mă bruă leh anăn phung êdam êra mâo klei hdĭp dleh dlan mă bruă jăk hĭn leh dưi drông sa wưng tết hơuh mđao”.

Hlăm hdră “Yan mnga knông lăn – tết plao ksĭ” nao mbĭt hŏng bruă kriê dlăng tết kơ phung êdam êra mă bruă, phung mă bruă mkŏ mjing ti să Mô rai, kdriêk Sa Thầy, Êpul khua bruă êdam êra  gưl dlông mđup brei 20 hnư mnơ̆ng kơ phung mâo kơhưm mnuih djuê ƀiă, mđup brei 2 kdrăp măi tĭnh, kdrăp mđung asăp kơ bruă êdam êra  să Mô Rai. Ƀri wưng tết knhuah gru djuê ana, Êpul khua bruă êdam êra  gưl dlông mbĭt hŏng čar Kon Tum nao čuă, hơêč hmưi Tết, mđi ai, mđup brei dŭm hnư mnơ̆ng kơ phung knuă druh, lĭng kahan, kahan ksiêm să Ia Dom leh anăn kđông kahan knông lăn Ia Dom, kdriêk Ia G’Drai.

Blŭ hrăm hlăm hdră, Khua bruă êdam êra  gưl dlông Ngô Văn Cương brei thâo, hdră “Yan mnga knông lăn – tết plao ksĭ” jing bruă grăp tuôr mâo Êpul khua bruă êdam êra gưl dlông mkŏ mjing hlăm wưng giăm Tết Nguyên đán. Hdră anei kñăm hâo hưn, mtô bi hriăm, mđĭ hĭn klei thâo săng kơ phung êdam êra, phung êdam êra leh anăn phung hđeh kơ klei yuôm bhăn mơ̆ng knông lăn hlăm klei mđĭ kyar bruă duh mkra ala ƀuôn, răng mgang klei êđăp ênang knông lăn ala čar, bi lar ai tiê thâo khăp, thâo pap, kriê dlăng, đru kơ phung êdam êra, phung êdam êra, phung hđeh, mnuih ƀuôn sang mâo klei hdĭp dleh dlan hlăm wưng tết Nguyên đán. Ayŏng Ngô Văn Cương ăt mñă kơ Êpul bruă êdam êra čar Kon Tum gĭt gai dŭm gưl bruă êdam êra hlăm bruă lŏ dơ̆ng hâo hưn kơ hdră anei čiăng bi lar dŭm mta bruă tŭ dưn hlăm dŭm hruê knhal jih thŭn, mprăp drông Tết./.