Ti krah êa poh yă, plao ksĭ Phú Quý (čar Lâm Đồng) ƀuh msĕ si boh tâo hriêr. Kbưi hŏng klei hdĭp tluk mtlak, klei uêñ mĭn mơ̆ng ƀuôn prŏng phŭn Hà Nội, amai Ngô Thị Hồng Ánh nao duah mđiă, angĭn leh anăn klei siă suôr mơ̆ng anak mnuih ti plao ksĭ Phú Quý. Anei amâo djŏ jing gưl tal êlâo amai truh ti plao ksĭ siam anei, dŭm klei khăp mơ̆ng lăn, klei khăp anak mnuih anôk bruă knơ̆ng Phú Quý ăt ngă kơ amai msĕ si bi tuôm hŏng mah jiăng sĭt suôr. Dŭm klei ktuê dlăng ti krah êa ksĭ mtah jing dŭm hruê amai Ánh dưi ñŭ kma hlăm klei jăk leh anăn klei siam mơ̆ng plao ksĭ.

 “Kâo ƀuh nao hiu čhưn ênguê Phú Quý ba wĭt klei tŭ dưn jăk êdi. Mnuih ƀuôn sang tinei bi myuôm bruă răng mgang wăl hdĭp mda, grăp čô khăp kơ phung tuê. Ênoh bi liê ti Phú Quý găl guôp. Dŭm klei ktuê dlăng hŏng Phú Quý mơ̆ng gưl êlâo truh kơ gưl anei ăt ƀuh hlăm ai tiê klei jăk êdi”

Leh bi mŭt mbĭt, čar Lâm Đồng hŏng wăl anôk mrâo mâo wăt Dak Nông leh anăn Bình Thuận hđăp pŏk sa wăl anôk đĭ kyar prŏng. Ară anei, phung tuê dưi ktuê dlăng sa 3 kiêng yuôm: Đà Lạt êbâo mnga, Ơrôp ti krah krĭng hlơr, Mũi Né – boh ktâo hriêr mơ̆ng bruă hiu čhưn ênguê êa ksĭ Ngŏ Dhŭng Asi leh anăn Tà Đùng – Kplang Hạ Long ti čư̆ čhiăng. Ayŏng Lê Văn Thức, khua sa knơ̆ng bruă hiu čhưn ênguê ti Đà Lạt brei thâo, anei srăng jing bruă hiu čhưn ênguê kluôm dhuôm, klă sĭt iêo jak mơ̆ng čư̆ dliê truh kơ êa ksĭ mtah.

 “Kâo đăo knang jing êlan klông hlăm wưng kơ anăp srăng kluôm mkŏ mơ̆ng Đà Lạt truh kơ Mũi Né, mơ̆ng Đà Lạt găn Gia Nghiã amâodah Tà Đùng jing 3 kiêng, sơnăn jing jăk êdi”.

Mbĭt hŏng Lâm Đồng,  bruă hiu čhưn ênguê ăt lar bra truh ti Dak Lak. Krah krĭng mnơ̆ng kriê pioh, hruê mmông msĕ mdei hĕ hlăm ênai čing kwang bŏ čư̆ dliê, klei drông jum mơ̆ng anak mnuih leh anăn dŭm knhuah siam mơ̆ng krĭng lăn anei klă sĭt truh kơ ai tiê phung tuê mơ̆ng kbưi. Gưl tal êlâo truh ti krĭng lăn bazan, Nguyễn Văn Minh, sa čô tuê mơ̆ng ƀuôn prŏng Đà Nẵng klă sĭt buh siam êdi dŭm knhuah dhar kreh mơ̆ng čar Dak Lak:

“Dhar kreh čing čhar jing jăk êdi leh anăn kpiê čeh tinei mnăm jăk êdi mơh. Anei ăt jing gưl tal êlâo kâo hriê tinei, phung mă bruă tinei ăt jăk êdi.”

Mta kñă thŭn anei jing čar Gia Lai, anôk mkŏ mjing Thŭn hiu čhưn ênguê ala čar 2026. Phạm Anh Tuấn, khua Bruă sang čư̆ êa čar Gia Lai brei thâo, alŭ wăl dôk gĭr bi mrâo hŏng dŭm mta bruă bi mguôp bi kna pla wah ênaih dhuai čư̆ dliê leh anăn ênhiang mmuñ mrâo mraog. Anei jing tur knơ̆ng čiăng kơ Gia Lai kdlưn hĭn, ba bruă hiu čhưn ênguê jing bruă duh mkra phŭn leh anăn bi klă anăn knăl “čư̆ čhiăng truh ti êa ksĭ” hlăm hră kak hiu čhưn ênguê tar rŏng lăn.

“Čar Gia Lai ƀuăn srăng mkŏ mjing tŭ dưn Thŭn hiu čhưn ênguê ala čar 2026 hŏng ai tiê thơ̆ng kơ bruă, êđăp ênang, jăk, knhuah gru čiăng kơ grăp čô tuê hriê ƀuh klă klei siă suôr, klei mdê leh anăn hdơr nanao.”

Leh bi mŭt anôk bruă knŭk kna, dŭm čar Lăn Dap Kngư – Dhŭng Kwar krah mâo sa wăl anôk đĭ kyar kluôm, bi kƀĭn dliê – êa ksĭ – čư dliê leh anăn dhar kreh dŭm djuê ana. Mơ̆ng boh sĭt anăn, lu knơ̆ng bruă dôk kčưm mkŏ mjing dŭm mnơ̆ng dhơ̆ng hiu čhưn ênguê mlir krĭng, pŏk sa wăl anôk ktuê dlăng bruă hiu čhưn ênguê brei phung tuê ƀuh. Nguyễn Minh Trí, sa knơ̆ng bruă ba yua êlan hiu čhưn ênguê Dak Lak – Khánh Hoà brei thâo:

 “Sa êlan nao srăng mâo lu anôk truh hĭn, êlan anăn mâo êa ksĭ, mâo dliê, mâo dhar kreh, mnơ̆ng ƀơ̆ng. Srăng mkŏ Dak Lak leh anăn Khánh Hòa jing anôk kluôm. Hlăm 3 hruê, êjai phung tuê hriê ti Khánh Hòa dưi mnei êa ksĭ, srăng weh ti Ngŏ Dak Lak dlăng drai Nghêng Phong, nao ti Dak Lak dlăng kơ dhar kreh, hnoh êa, čư̆ dliê, ênao êa, drai êa”.

Čư̆ čhiăng truh ti êa ksĭ amâo djŏ knŏng jing klei mkŏ wăl anôk, ƀiădah jing klei ñŭ kma mnơ̆ng kriê pioh leh anăn ai tie. Êjai mnuih ƀuôn sang thâo mpŭ kơ kdrăn san hô, êjai bruă knŭk kna ƀuăn ngă jăk leh anăn thơ̆ng kơ bruă, êjai anăn bruă hiu čhưn ênguê klă sĭt jing bruă duh mkra phŭn, hơĭt kjăp, bi mngač sa Việt Nam krưh kơăm leh anăn knhuah gru./.