VOV4.Êđê- Leh 19 hrue mă bruă hŏng bruă klam prŏng, tlam mbrue (16/6) klei bi kƀĭn tal 3 bruă kƀĭn ala gưl 15 mâo bi leh hŏng klei jăk, djŏ hŏng klei kñăm čiăng, lehanăn mkŏ mjing klei bi kƀĭn bi ruĕ. Êlâo kơ Khua bruă kƀĭn ala blŭ klei bi ruĕ klei bi kƀĭn tal 3 Bruă kƀĭn ala gưl 15, phung bi ala bi mklă kơ boh tŭ dưn klei ksiêm dlăng “Kơ bruă hlue ngă hdră êlan, hdră bhiăn kơ bruă čuăl mkă yap mơ̆ng leh hdră bhiăn čuăl mkă mâo klei tŭ dưn”; Hdră mtrŭn kơ bruă êmuh lehanăn wĭt lač klei êmuh.

Bruă kƀĭn ala ăt bi mklă mơh hdră mtrŭn mơ̆ng klei bi kƀĭn tal 3 anei, hlăm anăn lŏ bi tai wưng ba yua jih jang klei čoh čuăn mơ̆ng hdră mtrŭn mrô 42/2017 mơ̆ng bruă kƀĭn ala, kơ bruă mghaih msir nư ka dưi tla, mơ̆ng dŭm anôk bruă brei čan prăk, dŭm bruă djŏ tuôm hŏng bruă mkra êlan Hồ Chí Minh, lehanăn klei kơ ngăn prăk čan mơ̆ng ala tač êngao lŏ wĭt brei čan, klei knŭk kna đru mgang kơ bruă ngăn prăk knŭk kna lehanăn dŭm mta bruă yuôm bhăn mkăn hlăm lăn čar./.

Pô mblang: Y-Khem Niê