VOV4.Êđê-  Aguah mbrue (23/5), ti sang bruă kƀĭn ala, ti gŭ klei kiă kriê mơ̆ng khua bruă kƀĭn ala Vương Đình Huệ pŏk leh klei bi kƀĭn tal 3, bru kƀĭn ala gưl 15. Êlâo klei bi kƀĭn pŏk, Khua lăn čar Nguyễn Xuân Phúc, Khua knŭk kna Phạm Minh Chính, Khua bruă kƀĭn ala Vương Đình Huệ lehanăn phung bi ala bruă kƀĭn ala nao dưm leh kwang mnga, nao čuă msat Khua gĭt gai Hồ Chí Minh.

Ti anôk bi kƀĭn anei, Bruă kƀĭn ala srăng ksiêm, bi klă hdră êlan duh kơ 5 mta bruă mkra êlan yuôm bhiăn jing Êlan Dar mrô 4 krĭng ƀuôn prŏng phŭn Hà Nội, êlan Dar mrô 3 ti ƀuôn prŏng Hồ Chí Minh; êlan êran pral Biên Hoà - Vũng Tàu; Êlan êran pral Khánh Hoà - Ƀuôn Ama Thuôt, êlan êran pral Châu Đốc – Cần Thơ – Sóc Trăng. Khua bruă kƀĭn ala Vương Đình Huệ mñă, phung bi ala mđing kơ dŭm bruă mjêč, hlăm dŭm bruă rŭ mkra, mbha gưl duh bi liê, mâo klei bi sa hnơ̆ng hlăm jih jang bruă čuăl mkă mơ̆ng ala čar, mơ̆ng krĭng lehanăn alŭ wăl mâo bruă mkra êlan anăn găl djŏ kñăm ngă hŏng klei ênưih, dưi bi kna ngăn prăk, lehanăn ngă bruă, mghaih msir kơ hdră bi klă klei rŭ mkra jing pral ƀiădah ngă bruă lĕ êmưt, amâo thâo lŏ leh, luič liê ngăn prăk lu./.

Pô mblang: Y-Khem Niê