VOV4.Êđê- Tlam mbrue (11/1), ti anôk bi ruĕ klei bi kƀĭn mjêč tal sa, Bruă kƀĭn ala gưl 15, phung bi ala mâo leh klei bi klă kơ hdră mtrŭn lông bi hmô dŭm mta klei bhiăn hdră êlan truăn mđĭ kyar hjăn kơ ƀuôn prŏng Cần Thơ hŏng ênoh 92,79 pô bi ala tŭ ư, hdră mtrŭn anei mâo klei tŭ dưn mơ̆ng hrue 1/3/2022 lehanăn dưi hlue ngă hlăm 5 thŭn. Hdră mtrŭn anei srăng kčưm bi ruh mgaih djăp mta klei dôk gun kpăk pioh kơ Cần Thơ dưn yua jih klei găl pô iêo jak klei duh bi liê, mđĭ kyar bruă lŏ hma hŏng klei pral lehanăn kjăp čiăng kơ jing ƀuôn prŏng knơ̆ng hlăm krĭng Dap Mnai Krông Cửu Long hŏng klei găl, klei dưi mđĭ kyả rbruă lŏ hma, bruă tuh tia, bruă hiu čhưn ênguê, mkŏ bruă mnia mblei lehanăn hgŭm hŏng tač êngao. Bruă kƀĭn ala bi klă hdră mtrŭn lông bi hmô dŭm klei bhiăn mđĭ kyar ƀuôn prŏng Cần Thơ srăng jing boh kdrŭt jăk čiăng kơ Cần Thơ hđuh hlăm klei đĭ kyar wưng kơ anăp./.

Pô mblang: Y-Ƀel Êban