VOV4.Êđê - Lŏ dơ̆ng hlăm hdră klei kƀĭn tal 3, aguah mbruê 14/6, bruă kƀĭn ala bi klă leh klei bhiăn kahan ksiêm knhăk leh anăn hdră mtrŭn kơ bruă mkŏ mjing êpul ksiêm dlăng hdră mkăp mơ̆ng bruă kƀĭn ala thŭn 2023. Hŏng 91,16% ênoh hrăm mplĕ tŭ ư, bruă kƀĭn ala bi klă leh klei bhiăn kahan ksiêm knhăk. Klei bhiăn mâo 5 kdrêč, 33 mta, klei bhiăn: kahan ksiêm knhăk jing êpul lĭng kahan yang ƀuôn hlăm kahan ksiêm yang ƀuôn Việt Nam, jing êpul êya kmeh gơ̆ng ngă bruă răng mgang klei êđăp ênang ala čar, rơ̆ng klei êđăp ênang yang ƀuôn. Klei bhiăn bi klă dŭm mta bruă amâo mâo dưi ngă, hlăm anăn mâo bruă amâo mâo dưi bi kdơ̆ng, bi kpăk klei ngă bruă mơ̆ng kahan ksiêm knhăk. Amâo mâo dưi sun ngăn amâodah mâo dŭm mta bruă ngă kpĭ phung knuă druh, kahan ksiêm knhăk ngă soh hŏng klei dưi bruă klam dưi jao. Klei bhiăn ăt bi klă dŭm hdră bhiăn mơ̆ng phung knuă druh, kahan ksiêm knhăk, mâo klei mpŭ leh anăn răng mgang klei dưi, klei tŭ djŏ hŏng klei bhiăn ala čar mơ̆ng dŭm anôk bruă, êpul êya, grăp čô, mâo klei bi mguôp hŏng mnuih ƀuôn sang, mpŭ, jih ai đru kơ mnuih ƀuôn sang. Jhŏng ktang, mâo klei răng, mprăp klei bi blah, bi leh jih jang bruă klam dưi jao leh.

Y-Ƀel pô mblang