VOV4.Êđê - Tlam mbrue (7/6), Bruă kƀĭn ala kčưm kơ klei bi kƀĭn êmuh lehanăn wĭt lač klei êmuh tal êlâo hlăm dua hrue mkrah bi kčah ngă bruă anei. Khua phŭn bruă lŏ hma Lê Minh Hoan jing mnuih tal êlâo wĭt lač êmuh ti anăp phung bi ala bruă kƀĭn ala. Blŭ pŏk bruă anei, Khua bruă kƀĭn ala Vương Đình Huệ lač, bruă êmuh hlăm klei bi kƀĭn tal anei dưi mkŏ mjing mă klei êmuh mơ̆ng êpul, kñăm hlăm dŭm bruă phŭn, bruă klam mơ̆ng grăp čô mnuih, pô anăn srăng wĭt lač. 4 êpul bruă mâo klei êmuh jing dŭm bruă mơ̆ng knŭk kna kiă kriê msĕ si dŭm phŭn bruă: Ngăn prăk; Bruă lŏ hma; Bruă êlan klông dŭ mdiăng; Bruă knơ̆ng prăk knŭk kna Việt Nam hlăm klei bi kƀĭn anei. Kơ bruă lŏ hma, hlăm anôk bruă kƀĭn ala mâo leh lu klei êmuh kơ “Klei djŏ boh mnga ƀiădah luič ênoh”, lehanăn dŭm bruă dŏng đru kăp hrui blei boh mnga, adôk nanao, klei kơ ênoh ênil hbâo pruê, êa drao răng mgang mnơ̆ng pla mjing, mnơ̆ng ƀơ̆ng kơ mnơ̆ng rông, lehanăn dŭm mta mnơ̆ng pioh duh kơ bruă lŏ hma đĭ yuôm sơăi. Wĭt lač jih jang klei phung bi ala bruă kƀĭn ala êmuh, snăn dŭm hdră mâo Khua phŭn bruă Lê Minh Hoan kñăm anăn jing bruă lŏ mkŏ wĭt bruă duh mkra, mtrŭt phung pla mjing mŭt hlăm êpul hgŭm. Lehanăn mñă bi mlih hdră êlan pla mjing lŏ hma đuĕ nao kơ hdră êlan duh mkra pla mjing./.

Mơ̆ng bruă ktuê dlăng klei hưn mdah mơ̆ng Khua phŭn bruă lŏ hma leh anăn mđĭ kyar krĭng ƀuôn sang Lê Minh Hoan, Nay Hứ 66 thŭn, bi ala kơ mnuih ƀuôn sang ƀuôn hgŭm Tây Sơn, ƀuôn prŏng Pleiku, čar Gia Lai mđing kơ dŭm hdră msir Khua phŭn bruă ba mdah hŏng bruă ênoh mnơ̆ng dhơ̆ng lŏ hma đĭ ară anei. Ñu čang hmăng, leh klei bi kƀĭn, Phŭn bruă lŏ hma leh anăn mđĭ kyar krĭng ƀuôn sang mâo hdră kčah klă klơ̆ng djŏ guôp hŏng dŭm alŭ wăl, krĭng kwar hlăm bruă msir mgaih klei gun kpăk hlăm hdră mđĭ kyar bruă lŏ hma: “Čang hmăng leh klei bi kƀĭn, Khua phŭn bruă mâo hdră kčah klă klơ̆ng, klei ktrâo lač kơ grăp krĭng kwar bi djŏ guôp. Si tô hmô msĕ si Lăn Dap Kngư, lu jing ngă lŏ hma, si bĕ ngă čiăng gĭt gai hdră êlan lŏ hma ti lăn Dap Kngư djŏ hdră, tŭ dưn hĭn”.

 Hruê anei, Khua phŭn bruă lŏ Hma leh anăn mđĭ kyar krĭng ƀuôn sang Lê Minh Hoan lŏ dơ̆ng wit lač klei êmuh ti anăp bruă kƀĭn ala. Leh anăn jing klei êmuh leh anăn wĭt lač mơ̆ng Khua phŭn bruă ngăn prăk Hồ Đức Phơk leh anăn Khua Knơ̆ng prăk knŭk kna Việt Nam Nguyễn Thị Hồng.

Y – Khem + H’ Zawut pô mblang