VOV4.Êđê- Aguah mbruê 6/6, Klei kƀĭn tal 3, bruă kƀĭn ala gưl 15 bi trông hluê êpul kơ hdră êlan duh bi liê 3 bĭt êlan dơ̆ng pral Châu Đốc - Cần Thơ - Sóc Trăng (wưng tal 1); Khánh Hòa - Ƀuôn Ama Thuôt (wưng tal 1); Biên Hòa -Vũng Tàu (wưng tal 1) leh anăn hdră êlan duh bi liê êlan dar 4 krĭng ƀuôn prŏng phŭn Hà Nội leh anăn êlan dar mrô 3 ƀuôn prŏng Hồ Chí Minh. Lu phung bi ala bi êdah klei sa ai hŏng hdră êlan duh bi liê 5 hdră mkra êlan anei čiăng mđĭ kyar bruă duh mkra – ala ƀuôn, mđĭ kyar bruă mkŏ mkra êlan klông, ruh mgaih klei dleh kpăk hlăm bruă dŭ mdiăng mnơ̆ng dhơ̆ng, bi hrŏ klei bi drăm êdeh êdâo. Ƀiădah phung bi ala ăt mâo klei blŭ bi mguôp klă klơ̆ng, mñă kơ knŭk kna bi klă dŭm mta phŭn hlăm hdră êlan duh bi liê ăt msĕ hŏng dŭm hdră êlan ngă bruă. Hŏng 3 hdră mkra êlan Châu Đốc - Cần Thơ - Sóc Trăng; Khánh Hòa - Ƀuôn Ama Thuôt; Biên Hòa -Vũng Tàu, mâo đa đa phung bi ala bi êdah klei uêñ mĭn kyua djŏ tuôm hŏng lu ênhă lăn dliê, hlăm anăn knŏng hdră mkra êlan dơ̆ng pral Khánh Hoà – Ƀuôn Ama Thuôt čiăng mlih lăn dliê truh kơ 219 êbâo ha.

Pô mblang: Y-Ƀel Êban