Lŏ dơ̆ng hlăm klei bi kƀĭn tal 6, hrue anei (30/10) bruă kƀĭn ala čhuang hlăm hrue kăm mă bruă tal 2. Hlăm hrue anei, phung bi ala bi trông hlăm sang bi kƀĭn kơ bruă hlue ngă dŭm hdră mtrŭn mơ̆ng bruă kƀĭn ala hlăm klei lăn čar kñăm mkŏ mkra krĭng ƀuôn sang mrâo wưng thŭn 2021 – 2025, bi hrŏ ƀun hŏng klei kjăp wưng thŭn 2021 – 2025, mđĭ kyar krĭng mnuih djuê ƀiă krĭng čư̆ čhiăng wưng thŭn 2021 – 2030. Truh jih mlan 8 thŭn anei, ênoh duh bi liê kơ 3 bruă anei jing 16 êbâo 300 êklai prăk, mrâo mâo giăm 48% hdră kčah.

Prăk bi liê ka năng ôh hŏng bruă čiăng, prăk mơ̆ng gưl dlông truh hlăm klei êmưt (wưng 3 mlan tal dua thŭn 2022 mrâo jao). Ênoh prăk mơ̆ng alŭ wăl ka jăk găl. Klei bi hrŏ ƀun ka dưi bi leh ôh mkă hŏng hdră kčah, ka mâo lu hdră ngă jăk ôh, boh nik hlăm krĭng mnuih djuê ƀiă, krĭng čư̆ čhiăng. K’iăng khua knŭk kna Trần Lưu Quang brei thâo: Knŭk kna akâo kơ bruă kƀĭn ala ba jao ênoh prăk kơ thŭn 2023 ba yua kơ thŭn 2024 lehanăn mtă kơ alŭ wăl amâo mâo djŏ knŏng yua jih ngăn prăk leh bi liê, ƀiădah mđing kơ bruă rŭ mkra bi kjăp jih jang bruă./.