VOV4.Êđê - Hrue anei (10/6), Bruă kƀĭn ala trông čhai kơ hdră mkra 5 êlan dơ̆ng prŏng, mâo: Êlan dar mrô 4 krĭng ƀuôn prŏng phŭn Hà Nội; êlan dar mrô 3 ƀuôn prŏng Hồ Chí Minh; bruă mkra êlan dơ̆ng pral Châu Đốc – CầnThơ – Sóc Trăng; êlan Khánh Hoà - Ƀuôn Ama Thuôt; êlan Biên Hoà – Vũng Tàu. Anei jing dŭm mta bruă mâo leh hdră mtrŭn mơ̆ng klei bi kƀĭn prŏng Đảng 13 lehanăn hdră mtrŭn mrô 31 mơ̆ng bruă kƀĭn ala kơ klei đru bruă duh mkra hlăm 20 thŭn, mkra wĭt êlan klông lehanăn mâo klei mkŏ hŏng djăp krĭng wăl.

Tlam mbrue, klei bi kƀĭn tal 3, Bruă kƀĭn ala gưl 15 bi leh bruă êmuh lehanăn wĭt lač klei êmuh hlăm dua hrue mkrah. K’iăng khua knŭk kna Phạm Bình Minh lŏ dơ̆ng bi mngač djăp mta bruă djŏ tuôm kơ klei phung bi ala bruă kƀĭn ala êmuh. Snăn klei bi kƀĭn tal anei mâo klei bi mlih jăk, amâo mâo ôh klei knŏng bi êdah klei dưi ngă, snăn jing mâo lu mmông hĭn čiăng kơ phung bi ala êmuh. Jih jang klei mâo bruă kƀĭn ala ruah tal anei jing djŏ hŏng bruă knuă, klei phung ƀuôn sang čang hmăng. Klei phung khua phŭn bruă wĭt lač jing klă, djŏ hŏng bruă, mâo klei phung bi ala tŭ ư./.

Y-Khem pô mblang