Bruă mâo mnuih ƀuôn sang mđing jing hlăm hră čih tal anei mbŏ dhŏng hlăm êpul kdrăp phao ktuang. Hlue si Phŭn bruă kahan ksiêm, hlăm wưng êgao, boh klei yua soh hdră bhiăn phao ktuang čŏng mkra mjing arưp leh anăn ngă klei jhat dleh ktuê dlăng. Hlăm 5 thŭn êgao ƀuh leh giăm 17.000 klei, mă kơ̆ng êbeh 26 êbâo čô yua dhŏng ba klei djiê êka čiăng ngă jhat, lu mnuih ƀuôn sang ngêñ.

Boh sĭt ksiêm dlăng klei ngă soh brei ƀuh, knŏng msir mgaih hlue si hdră bhiăn tơdah djăp klei găl klah cŭn bi mklă pô ngă soh, amâo msir mgaih ôh phung mkăm pioh phao ktuang, kyua hlăm hdră bhiăn ară anei amâo kčah ôh dhŏng jing sa hlăm kdrăp phao ktuang. Hră čih hdră bhiăn dôk hưn mdah hŏng bruă kƀĭn ala bi trông, kčah dhŏng jing mnơ̆ng huĭ hyưt ba lu klei djiê êka tơdah phung ngă soh yua hlăm hdră kñăm soh hdră bhiăn, Phung yua dhŏng hlăm hdră kñăm mă bruă, mkra mjing, hdĭp mda srăng amâo ngă soh ôh hŏng klei mkra mlih mơ̆ng hdră bhiăn anei.