Khua sang phat mkra gưl dlông mrâo bi klă đĭ păn bruă hluê si klei čuăn. Blŭ hrăm đĭ păn bruă,  Nguyễn Văn Quảng bi êdah klei lač jăk kơ Êpul khua bruă Đảng gưl dlông, phŭn bruă kđi čar, Êpul khua bruă Đảng, Khua gĭt gai Đảng Tô Lâm leh anăn phung khua gĭt gai Đảng, Knŭk kna đăo knang jao bruă klam mrâo, Bruă Kbĭn ala đăo knang ruah mdưm ñu păn ngă Khua anôk bruă phat mkra gưl dlông.

Hŏng bruă klam jing khua kiă kriê anôk bruă phat mkra, anôk bruă hluê ngă hdră bhiăn hluê si klei čuăn mơ̆ng Hdră bhiăn phŭn ala čar yang ƀuôn ngă phŭn Việt Nam, khua kiă kriê sang phat mkra gưl dlông Nguyễn Văn Quảng brei thâo srăng ngă djŏ hŏng klei ƀuăn ti anăp Bruă Kbĭn ala, hluê ngă klei gĭt gai mơ̆ng Đảng, hluê ngă djŏ hdră bhiăn leh anăn hdră bhiăn phŭn, hdră bhiăn lăn čar.