VOV4.Êđê - Lŏ dơ̆ng hdră hlăm klei kƀĭn tal 3, hruê anei 9/6, bruă kƀĭn ala ngă klei ksiêm êmuh leh anăn wĭt lač klei ksiêm êmuh. Aguah anei, khua kiă kriê knơ̆ng bruă ngăn prăk knŭk kna Việt Nam Nguyễn Thị Hồng lŏ dơ̆ng wĭt lač klei ksiêm êmuh ti anăp bruă kƀĭn ala. Lŏ dơ̆ng kơnăn, khua phŭn bruă êlan klông leh anăn dŭ mdiăng Nguyễn Văn Thể leh anăn k’iăng Khua knŭk kna Phạm Bình Minh wĭt lač klei ksiêm êmuh ti anăp bruă kƀĭn ala. Mta phŭn mâo khua phŭn bruă Nguyễn Văn Thể bi klă hlăm klei ksiêm êmuh hruê anei jing: klei ngă bruă, hnơ̆ng tŭ jăk leh anăn bruă gang mkhư̆ klei luč liê mang hlăm bruă hluê ngă dŭm hdră mkăp, bruă mkŏ mkra êlan klông ala čar kñam, êlan dơ̆ng pral. Bruă ksiêm dlăng, ktuê dlăng, rơ̆ng hnơ̆ng tŭ jăk dŭm bruă mkŏ mkra êlan klông dưi duh bi liê mơưng ngăn prăk ala čar. Boh sĭt leh anăn hdră mgaih msir dŭm klei dleh kpăk hlăm klei duh bi liê, mă yua, mnia mblei dŭm bĭt êlan hluê si hdră BOT. Hlăm klei ksiêm êmuh, phung bi ala bruă kƀĭn ala, phung thơ̆ng kơ bruă leh anăn phung bi ala hmăng hmưi dŭm hdră êlan klưn hĭn mơ̆ng khua phŭn bruă dŭ mdiăng leh anăn êlan klông ba mdah leh srăng mtrŭt mđĭ bi hmar bruă bi leh dŭm mta bruă mkŏ mkra ala čar kñăm.

Y-Ƀel pô mblang