Lŏ dơ̆ng hlăm klei kƀĭn tal 5, Bruă kƀĭn ala mkăp kluôm mmông kƀĭn hruê mbruê 29/5 čiăng ksiêm dlăng bruă tiŏ nao, kriê dlăng leh anăn ba yua ai dưi đru kơ bruă gang mkhư̆ klei ruă tưp Covid-19; bruă hluê ngă dŭm hdră êlan, klei bhiăn ala čar kơ bruă mdrao mgŭn nah gŭ, bruă mdrao mgŭn mkăp. Hưn mdah ti anăp bruă kƀĭn ala, Khua kiă kriê dhar bruă yang ƀuôn mơ̆ng Bruă kƀĭn ala, k’iăng khua êpul ktuê dlăng mơ̆ng Bruă kƀĭn ala Nguyễn Thúy Anh brei thâo, truh kơ mlan 4/2023, Êpul mâo leh dŭm klei hưn hŏng 15.659 pŏk mơar.

Êpul ksiêm dlăng brei thâo, kơ bruă iêo mkrum ngăn prăk gang mkhư̆ klei ruă tưp, knŭk kna tĭng mkă kluôm ai dưi klă anăp kơ bruă gang mkhư̆ klei ruă tưp leh anăn hluê ngă hdră êlan yang ƀuôn hlăm wưng thŭn 2020 – 2022 hlăm brô 230.000 êklai prăk, hlăm anăn mơ̆ng ngăn prăk knŭk kna jing êbeh 186.000 êklai, bi adôk mơ̆ng ngăn prăk mkăn. Djŏ tuôm hŏng bruă blei kdrăp ksiêm mkă kman mơ̆ng knơ̆ng bruă Việt Á, êpul ksiêm dlăng brei thâo, truh kơ akŏ mlan 5, hluê si klei hưn mơ̆ng Phŭn bruă kahan ksiêm, dŭm anôk bruă ksiêm duah kčŭt hưn leh 30 klei ngă soh, 107 čô ngă soh.