VOV4.Êđê- Hluê si hdră hlăm klei kƀĭn tal 3, bruă kƀĭn ala gưl 15, hruê anei 31/5, bruă kƀĭn ala mă bruă ti anôk bi kƀĭn leh anăn hŏng êpul bi trông kơ hdră čih mkra klei bhiăn yuôm bhăn. Mmông kƀĭn aguah, bruă kƀĭn ala srăng hmư̆ khua hlăm dhar bruă kƀĭn ala, khua kiă kriê dhar bruă klei bhiăn mơ̆ng bruă kƀĭn ala Hoàng Thanh Tùng hưn mdah klei hlăk mblang, mđing hmư̆, mkra mlih hdră čih mkra klei bhiăn, bi mbŏ dŭm mta hlăm klei bhiăn klei dưi kiă kriê. Leh kơnăn, bruă kƀĭn ala lŏ bi trông ti anôk bi kƀĭn kơ dŭm mta phŭn dôk mâo klei blŭ mdê mdê mơ̆ng hdră čih mkra klei bhiăn mkra mlih, bi mbŏ dŭm mta hlăm klei bhiăn klei dưi kiă kriê. Anôk bruă hưn mdah leh anăn anôk bruă gĭt gai bi mguôp hlăk mblang, bi klă dŭm klei phung bi ala bruă kƀĭn ala bi êdah leh. Hlăm mmông kƀĭn tlam, bruă kƀĭn ala srăng bi trông hŏng êpul kơ hdră klei bhiăn gang mkhư̆ klei ngă măk ƀai hlăm gŏ sang leh anăn klei bhiăn hluê ngă klei dưi êngiê nah gŭ.

Pô mblang: Y-Ƀel Êban