VOV4.Êđê- Lŏ dơ̆ng hdră hlăm klei kƀĭn tal 3, aguah mbruê 30/5, bi trông ti anôk bi kƀĭn kơ bruă hluê ngă hdră êlan, klei bhiăn ala čar kơ bruă čuăl mkă yap mơ̆ng klei bhiăn čuăl mkă mâo klei dưi ba yua, phung bi ala ktrâo klă dŭm klei dleh kpăk hlăm klei ksiêm dlăng čuăl mkă, ngă truh adôk 104 hdră čuăl mkă ka dưi mkŏ mjing, bi klă, hmăi truh kơ klei đĭ kyar bruă duh mkra – ala ƀuôn. Hluê si phung bi ala, klei bhiăn mkŏ mjing, bi klă hdră čuăl mkă srăng dưi mđung hlăm dŭm mbah hâo hưn điện tử mơ̆ng dŭm anôk bruă čuăl mkă. Ƀiădah, klă sĭt bruă hưn mdah klei hâo hưn bruă čuăl mkă knŏng khă bi mâo, boh nik jing hdră čuăl mkă mkŏ mjing, čuăl mkă lăn. Lu klei blŭ mơ̆ng phung bi ala hưn mdah hŏng bruă kƀĭn ala ba mdah hdră mtrŭn ksiêm dlăng bruă hluê ngă hdră êlan, klei bhiăn ala čar kơ bruă čuăl mkă leh anăn dŭm hdră êlan ruh mgaih klei dleh kpăk, mđĭ hnơ̆ng tŭ jăk leh anăn bi hmar klei ngă bruă čuăl mkă. Mbĭt anăn mñă bruă mkŏ mjing klei čuăl mkă srăng nao hŏng boh sĭt, thâo klă klei găl, mmông găl, klei dưi bi lông, bi ktưn mơ̆ng grăp phŭn bruă, dhar bruă, alŭ wăl, bi mbŏ hdră bhiăn, hdră ƀuah mkra hŏng klei ngă êmưt amâodah amâo mâo hưn mdah klei čuăl mkă.

Pô mblang: Y-Ƀel Êban