VOV4.Êđê- Hruê anei 6/6, Klei bi kƀĭn tal 3, Bruă kƀĭn ala gưl 15 mŭt hlăm hrue kăm mă bruă tal 3. Sa hlăm dŭm mta phŭn yuôm bhăn mâo phung bi ala bi trông hlăm êpul aguah anei jing Hdră mtrŭn duh bi liê Hdră bruă êlan dar mrô 3 ƀuôn prŏng Hồ Chí Minh leh anăn êlan dar mrô 4 krĭng ƀuôn prŏng phŭn Hà Nội. Lu phung thơ̆ng kơ bruă ăt lač klă, Hà Nội leh anăn ƀuôn prŏng Hồ Chí Minh jing klei mjĕ êrô, jing anôk truh mơ̆ng phung duh bi liê leh anăn tuê hiu čhưn ênguê. Bruă duh bi liê Hdră bruă êlan dar mrô 3 leh anăn 4, rơ̆ng kơ anôk bruă êlan klông găl ênưih ăt msĕ mơh đru yuôm bhăn hlăm bruă mtrŭt mđĭ, hưn mdah, iêô jak duh bi liê leh anăn phung tue ala tač êngao hriê čhưn ti Việt Nam. Hlue si klei bi kƀĭn, hlăm hrue kăm anei, Bruă kƀĭn ala ăt srăng bi trông kơ hră čih Hdră mtrŭn kơ klei lông ngă dŭm klei bhiăn, hdră êlan mdê hjăn mđĭ kyar čar Khánh Hoà, bi trông kơ bruă ba prăk čan lŏ brei čan dơ̆ng prăk Knŭk kna. Boh nik, Bruă kƀĭn ala pioh 2 hruê mkrah čiăng hmư̆ klei êmuh leh anăn wĭt lač klei êmuh kơ dŭm êpul bruă hlăm bruă lŏ hma leh anăn mđĭ kyar krĭng ƀuôn sang, bruă ngăn prăk, bruă knơ̆ng prăk leh anăn bruă êlan klông dŭ mdiăng.

                                               Pô mblang: H’Zawut Ƀuôn Yă