VOV4.Êđê - Hruê mbruê 1/6, bruă kƀĭn ala mâo leh klei kƀĭn kluôm ti anôk bi kƀĭn, kñăm bi trông kơ bruă bi mbŏ boh tŭ dưn klei hluê ngă hdră êlan mđĭ kyar bruă duh mkra – ala ƀuôn leh anăn ngăn prăk knŭk kna. Phung bi ala yap yuôm bhăn dŭm boh tŭ dưi mâo hlăm bruă gang mkhư̆ klei ruă tưp Covid-19. Ƀiădah, lu phung bi ala bi êdah “klei čang hmang prŏng” êjai “mâo prăk ƀiădah amâo mâo dưi brei čan”. Mbĭt anăn mñă kơ knŭk kna uêñ mĭn kiă kriê ênoh êa săng, êa pui leh anăn ênoh mnơ̆ng ƀơ̆ng huă. Ti anăp, tal êlâo hĭn bi hơĭt bruă duh mkra hnơ̆ng prŏng, ksiêm dlăng klei prăk luč ênoh, rơ̆ng klei hdĭp yang ƀuôn. Phung bi ala ba mdah leh lu hdră êlan kñăm mtrŭt mđĭ klei đĭ kyar bruă duh mkra hlăm hruê mmông kơ anăp čiăng dưi mâo mta kñăm bruă duh mkra ala čar drei đĭ kyar mơ̆ng 6 – 6,5%, ksiêm dlăng klei prăk luč ênoh 4% hlăm thŭn anei. hlăm anăn, mñă kơ knŭk kna čiăng mkŏ mjing dŭm hdră êlan hrăm mbĭt, mơ̆ng wưng bhiâo, man dưn leh anăn luč, bi djŏ guôp hŏng djăp klei mâo, boh nik čiăng mđing lu hĭn kơ bruă lŏ hma, sa mta bruă mâo bruă klam jing kmeh gơ̆ng hlăm wưng ala čar tuôm hŏng klei dleh dlan.

Y-Ƀel pô mblang