Khua bruă kƀĭn ala Vương Đình Huệ mñă, găn leh 98 thŭn rŭ mdơ̆ng lehanăn đĭ kyar, bruă klei mrâo Việt Nam mâo khua gĭt gai Hồ Chí Minh mkŏ mjing lehanăn kiă kriê hrăm mbĭt nanao hŏng hdră êlan bi blah mơ̆ng cách mạng, đru mguôp yuôm bhăn hlăm bruă rŭ mdơ̆ng lehanăn răng mgang lăn čar. Ti gŭ hla čhiăm gru mơ̆ng Đảng, bruă klei mrâo cách mạng Việt Nam amâo mâo mdei dưi đĭ kyar kơ hnơ̆ng wăk lehanăn boh prŏng, wăt knuih kơhưm. Lu gưl phung ngă bruă klei mrâo knŭk kna mâo bi kjăp, đĭ kyar lehanăn kpưn nao ti knhuang năng hŏng djuê ana, ñu kma hlăm klei đăo knang, lu knhuah gru mđrĭng hŏng klei đĭ kyar bruă klei mrâo tar rŏng lăn. Jih jang klei đru mguôp anăn bi klă leh knuih kơhưm, ai ktang mơ̆ng Việt Nam.

“Kâo mâo klei bi mni, lehanăn hơêč hmưi kơ êpul ngă bruă klei mrâo hlăm kluôm ala mâo nanao klei thâo gĭr ba wĭt leh lu boh tŭ dưn prŏng prĭn. Boh nik mâo ngă bruă bruă kiă kriê, gĭt gai, bi leh jăk bruă kčah jao, mjing djăp klei găl kơ bruă klei mrâo cách mạng, đru mguôp yuôm bhăn kơ klei mlih mrâo lehanăn ñu kma mơ̆ng ala čar pô hŏng ala tač êngao. Kâo yap, klei đru mguôp yuôm bhăn mơ̆ng dŭm gưl bruă klei mrâo Việt Nam mơ̆ng gưl dlông hlŏng kơ alŭ wăl dăl hlăm 73 thŭn êgao, amâo mâo mdei dưi bi klin, hyuă kjăp klei bi mguôp êpul knuă druh, mnuih ngă bruă, lŏ bi hriăm mbŏ, lehanăn răng mgang klei tŭ dưn klă mngač kơ ƀĭng hgŭm ngă bruă klei mrâo”.

Ăt ƀri bi hdơr 98 thŭn hrue bruă klei mrâo cách mạng Việt Nam, Trưởng Khua kiă kriê bruă hâo hưn gưl dlông Nguyễn Trọng Nghĩa kiă kriê leh klei bi mtuôm ƀô̆ mta, mă bruă hŏng phung khua kiă kriê dŭm anôk bruă klei mrâo bruă kđi čar jing knơ̆ng. Khua kiă kriê bruă hâo hưn gưl dlông lač, 12 anôk bruă klei mrâo bruă kđi čar jing knơ̆ng jih ai tiê leh ngă bruă mjuăt bi hriăm phung čih klei mrâo, phung dăp mkra klei mrâo, knuă druh mnuih ngă bruă klei mrâo kơ hnơ̆ng thâo hlăm bruă kđi čar, lehanăn klei thâo hlăm bruă knuă, ngă jăk bruă bi mlih mrô hlăm anôk bruă klei mrâo, klă sĭt jing leh anôk bruă ba akŏ hlăm bruă klei mrâo, mâo klei thâo bi hmô mkŏ mjing klei kreh dhar hlăm dŭm anôk bruă klei mrâo...   Khua kiă kriê bruă hâo hưn gưl dlông Nguyễn Trọng Nghĩa lač:

“Hrue bruă klei mrâo cách mạng thŭn anei, drei lŏ dlăng wĭt hlăm dua thŭn mkrah hlue ngă hdră mtrŭn tal 13 mơ̆ng Đảng –krah wưng păn bruă, lehanăn dlăng wĭt wưng ngă bruă kñăm bi hdơr 100 thŭn Hrue bruă klei mrâo cách mạng klă sĭt jing jăk. Hlue anăn, ksiêm wĭt jih jang bruă čuăn hlăm 2 thŭn mkrah, mkrah wưng hlue ngă hdră mtrŭn klei bi kƀĭn prŏng tal 13 hlăm bruă klei mrâo, hâo hưn, mđing hlăm dŭm anôk bruă klei mrâo knơ̆ng mơ̆ng Đảng mơ̆ng knŭk kna, dŭm gưl bruă Đảng lehanăn bruă sang čư̆ êa”.

Hrue 21/6, jing hrue mơak kơ mnuih ngă bruă klei mrâo cách mạng kluôm ala. Ti ƀuôn prŏng phŭn Hà Nội, mlam mmăt 21/6, mkŏ mjing knăm mđup brei klei pah mni klei bi lông bruă klei mrâo ala čar tal 17 thŭn 2022, hŏng 124 mta klei mrâo ba bi lông jing dŭm klei mrâo djăp ênoh čuăn kdlưn hĭn, mơ̆ng phung čih mkra, mkra klei mrâo ba bi lông mâo klei mpŭ mni. Klei bi lông tal anei mâo leh êbeh 1.890 dŭm klei čih mâo ba mơĭt bi lông mâo truh 157 klei mrâo truh ti gưl knhal tuič, Êpul gơ̆ng brei puăng bi lông ruah leh mâo 124 klei mrâo jing kdlưn hĭn pioh mđup brei klei pah mni, mâo 9 klei pah mni ênoh A, 24 klei pah mni ênoh B, 46 klei pah mni ênoh C, 45 klei pah mni mđĭ ai.

        Tui si Êpul gơ̆ng brei puăng klei bi lông, jih jang klei mrâo ba bi lông jing păn kjăp bruă kđi čar, klei duh mkra, dhar kreh, bruă răng mgang lăn čar, klei êđăp ênang yang ƀuôn lehanăn dŭm mta mkăn hlăm klei hdĭp hlăm lăn čar thŭn 2022, lač klă êdah jih kơ klei yuôm bhăn lăn čar dôk găn. Aduôn Đỗ Thị Thu Hằng, Khua kiă kriê Êpul hgŭm bruă kklei mrâo Việt Nam, K’iăng khua êpul gơ̆ng ksiêm bi mklă klei bi lông bruă klei mrâo lăn čar tal 17 brei thâo:

“Jih jang klei mrâo ba bi lông tal anei jing jăk sơăi. Jih jang klei čih jing djŏ hŏng klei sĭt, dôk găn djŏ hlăm dŭm bruă mjêč ktrŏ thŭn 2022 hlăm jih jang bruă kđi čar, bruă duh mkra bruă yang ƀuôn, bruă răng mgang klei êđăp ênang, mkŏ mjing Đảng... Lu klei čih mâo duh mĭn bi liê lu ai tiê bi mâo sa klei čih jăk, hmao hlak mblang hŏng boh klei dôk găn ară anei, mâo dŭm klei blŭ mgang kơ dŭm hdră êlan mơ̆ng Đảng, knŭk kna, bi êdah lu hdră êlan mrâo hŏng klei jăk, hdră ngă bruă djŏ, mâo ai thâo lar bra prŏng hlăm yang ƀuôn. Mâo lu klei čih jăk snăk, mâo duh bi liê, mâo hdră êlan jăk snăk bi êdah klei jĕ giăm, mbruă, djŏ hŏng mnuih dlăng”.

        Mta mrâo mơ̆ng klei bi lông tal anei, mbĭt hŏng dŭm anôk bruă klei mrâo gưl dlông, bruă klei mrâo alŭ wăl bi êdah klă boh tŭ dưn klei mlih mrâo, ngă hŏng lu hdră êlan, lu kdrăp mă bruă. Lu êpul hgŭm bruă klei mrâo čar ăt duh bi liê lu hlăm bruă hrŏng ruah dŭm klei čih, kñăm ba nao ti anôk bi lông mâo klei pah mni hlăm klei bi lông. Snăn klei bi lông bruă klei mrâo lăn čar tal 17 thŭn 2022, lu mta klei mrâo mâo lač lu klei čih jing jăk hĭn kơ thŭn êlâo, boh nik mâo dŭm êpul êya, alŭ wăl mâo klei duh bi liê jăk hĭn hlăm dŭm klei čih, mơĭt ba bi lông lu hĭn, mâo lu mta rup, klei čih lač mâo mbĭt hŏng rup lŏ bi mngač kơ klei pô čiăng čih, ƀuh jing bŏ hŏng klei mbruă hĭn leh./.