Hlăm 2 hruê mơ̆ng 12 – 13/12, dŭm klei hưn kơ klei hriê čuă gưl knŭk kna truh kơ Việt Nam mơ̆ng Khua gĭt gai Đảng, Khua gĭt gai China Tập Cận Bình mđung hlăm dŭm hră klei mrâo leh anăn bruă hâo hưn China. Rup mnuih Việt Nam drông khua gĭt gai China, knăm drông klă klơ̆ng, klei blŭ hrăm, mnăm êa čê, boh nik jing mmông Khua gĭt gai Đảng Nguyễn Phú Trọng mđup brei leh anăn hưn mdah hnư mnơ̆ng jing sa pŏk rup dua čô dôk mnăm êa čê ti bắc Kinh hlăm gưl nao čuă ti knhal jih thŭn 2022 kơ Khua gĭt gai Đảng, Khua gĭt gai China  Tập Cận Bình dưi mđung lu hlăm mbah hla pŏk yang ƀuôn.

Klei mrâo tlam Tân Hoa xã leh anăn Nhân Dân nhật báo, Khua gĭt gai Tập Cận Bình mñă klă “ Klei khăp siă suôr Việt Nam – China, jing ƀĭng hgŭm leh anăn ayŏng adei” jing ruh êdah hĭn kơ klei mjĕ giăm Việt Nam – China. China dlăng kơ klei mjĕ giăm hŏng Việt Nam mơ̆ng hdră êlan truh kơ wưng sui. Ñu đăo knang, hŏng dŭm klei gĭt mbĭt mơ̆ng dua tĭng, klei mjĕ giăm dua ala čar srăng mŭt hlăm wưng mrâo hŏng klei đăo knang bruă kđi čar, klei bi mguôp răng mgang klei êđăp ênang klă klơ̆ng hĭn. Bruă mkŏ mjing ala čar yang ƀuôn ngă phŭn mơ̆ng dua lăn čar lŏ dơ̆ng mâo lu boh tŭ dưn mrâo leh anăn mâo klei đru mguôp mrâo kơ klei đĭ kyar, klei hơĭt kjăp leh anăn mdrŏng sang mơ̆ng alŭ wăl leh anăn tar rŏng lăn.