Mlam mmăt mbrue 9/7, ti Sang muiñ ƀuôn prŏng Hồ Chí Minh mkŏ mjing Hdră mdah klei kdŏ mmuiñ bi hdơr kơ khua gĭt gai Đảng êlâo dih Lê Duẩn mâo êpul kdŏ mmuiñ kahan alŭ wăl 7 hgŭm hŏng sang kdŏ mmuiñ djuê ana Bông sen mkŏ mjing bi hdơr 37 thŭn hrue Khua gĭt gai Đảng êlâo dih Lê Duẩn djiê (10/7/1986-10/7/2023).

Khua lăn čar Võ Văn Thưởng nao ti anôk anei. Hdră mdah anei jing wưng čiăng kơ phung hđeh gưl mrâo ară anei bi hdơr kơ bruă knuă ai tiê mơ̆ng sa čô khua kiă kriê Đảng hur har jih ai tiê, đru kơ hđeh gưl mrâo thâo săng hĭn kơ klei hdĭp, bruă cách mạng mơ̆ng khua giŭt gai Đảng Lê Duẩn, boh nik ai tiê klei khăp mơ̆ng mnuih ƀuôn sang kwar dhŭng, ƀuôn sang ti Quảng Trị hŏng khua gĭt gai Đảng Lê Duẩn. Hŏng jih hdră mdah anei, dưi bi hmô kơ bruă cách mạng khua gĭt gai Đảng Lê Duẩn bŏ hŏng klei jhŏng ktang, lehanăn jăp siam. Mơ̆ng dŭm thŭn mlan ñu ti ƀuôn sang truh kơ nao krŭ kdơ̆ng hlăm krĭng lăn kwar dhŭng snăn ñu jing khua bruă Đảng alŭ wăl, hlŏng truh kơ klei pŏk klei bi blah mâo anăn pia Hồ Chí Minh hƀuê ênuk... mâo bi êdah klă mngač klei anăn./.