VOV4.Êđê - Hŏng 6 êpul êdam êra ba anăp Yan mdei prŏng Mtah dưi ba nao ti dŭm krĭng ƀuôn sang, hdră bruă anei ti Dak Lak ba wĭt leh lu gru kruăk jăk siam hŏng dŭm hdră bruă, kdrêč bruă klă klơ̆ng.

Krah yan mdei prŏng ƀiădah dŭm hruê êgao, hlăm wăl sang hră gưl sa Nguyễn Đình Chiểu, să knông lăn Ia Rvê, kdrêk Ea Sup, čar Dak Lak ăt hao hao ênai blŭ tlao. Hlăm dŭm adŭ hriăm, phung ayŏng amai čŏng ngă bruă jih ai tiê bi hriăm phung hđeh. Hriăm hră êjai, hlăp lêñ êjai, mđăo mơak snăk anăn phung hđeh khăp snăk.

Dôk guôn anak wĭt hriăm mjăt yan mde prŏng, amai Cầm Thị Nga, alŭ 4 să Ia Rvê brei thâo, sang mâo dua čô anak điêt anăn grăp yan mdei prŏng truh gŏ sang rŭng răng kyua alŭ wăl ƀiă tač hlăp kơ phung hđeh, huĭ phung anak dôk ti sang hlue găp nao hlăm êa krông, nao hlăp lêñ tuôm hĕ hŏng klei amâo jăk. Mơ̆ng leh mâo phung čŏng hriê đru bi hriăm hđeh hlăm yan mdei prŏng kơ phung hđeh ñu ƀuh hơĭt ai tiê, boh nik leh hmư̆ phung anak lač khăp nao hlăm adŭ hriăm.Dôk ti sang anăn ñu amao hriăm ôh ƀiădah nao hriăm snei snăn ñu kriăng hriăm hĭn. Ti sang čŏng hriăm snăn amâo kriăng ôh. Ñu lač hrie tinei mơak, khăp kơ ayŏng amai mtô. Brei kơ hđeh kriăng hriăm hĭn ăt mơak snăk đru ơ hđeh klei jăk kơ phung hđeh.

Dưi pŏk ngă mơ̆ng krah mlan 7 mrâo êgao, dŭm adŭ bi hriăm yan mdei prŏng ti sang hră gưl sa Nguyễn Đình Chiểu jing bruă ngă hlăm hdră Yan mdei prŏng mtah mơ̆ng phung mda asei kdriêk Ea Sup ti krĭng knông lăn.  Hlue anăn, 15 čô ba anăp mơ̆ng kdriêk leh anăn êbeh 65 čô nao ti dŭm alŭ ƀuôn mbha êpul nao čhưn leh anăn mđĭ ai phung hđeh kih mdoh wăl hdĭp mda, mbŏ klei thâo yan mdei prŏng. Đru kơ mnuih ƀôn sang kih mdoh wăl hdĭp mda, jik čuh rơ̆k rung, pla ana kyao mtah, hâo hưn mtô mblang kơ mnuih ƀuôn sang gang mkhư̆ klei ruă tưp. Amai Trang Nguyệt Quê, êdam êra ba anăp ti să Ia Rvê brei thâo, leh wưng suăi êmăn hŏng bruă hriăm ti sang hră gưl prŏng, ñu pioh 2 mlan yan mdei prŏng čiăng hgŭm hlăm bruă ngă kyua êpul êya, mbŏ klei thâo kơ pô, mbĭt anăn mguôp ai tiê pô dưi nao hŏng mnuih ƀuôn sang krĭng dleh dlan. Kâo ƀuh mơak snăk, mŭt tinei snăn kâo ƀuh dưi myơr sa kdrêč čiăng kơ mnuih ƀuôn sang ƀuh digơ̆ ăt dưi mđing dlăng. Kyua kâo dưi đru sa kdrêč ai tiê pô kơ bruă snăn phung hđeh dưi hriăm yan mdei prŏng leh anăn đru kơ mnuih ƀuôn sang tinei. Sitôhmô bruă hâo hư mtô mblang kơ klei ruă êngoh bi ƀlĕ êrah amâo djŏ knŏng mnuih ƀuôn sang ôh ƀiădah phung hđeh ăt dưi mđing dlăng leh anăn tal dua pô bi hriăm kơ phung hđeh, pô mâo klei jhŏng dôk ti anăp lu mnuih.

Ti să Ia Lôp, kdriêk Ea Sup, mbĭt hŏng êpul êdam êra ba anăp tinăn mtam, yan mdei prŏng thŭn anei lŏ mâo êpul yan mdei prŏng mtah čar Bình Dương đru. Hlăm 10 hruê dôk ti să, phung êdam êra ba anăp mơ̆ng čar Bình Dương pŏk ngă hdră bruă êdam êra ba anăp “Kuič mngač êlan krĭng ƀuôn sang” dlông êbeh 1km, đup brei kdrăp  hriăm hră kơ hđeh, mkŏ mjing Hruê lĭng kahan ba anăp hdơr knga tla ai ƀri gưl bi hdơr 75 thŭn Hruê phung kahan ba anăp – êngiă asei, hâo hưn mtô mblang hdră bhiăn, hâo hưn hdră gang mkhư̆ klei ruă tưp kơ mnuih ƀuôn sang, kih mdoh, čuh rơ̆k rung, mkra mđĭ dŭm ktuê êlan, mnuôr mđoh êa, Lang Văn Sơn, K’iăng Khua dlăng bruă Đảng, Khua Êpul Gơ̆ng mnuih ƀuôn sang să Ia Lôp lač:Dŭm êpul ba anăp wĭt snăn đru lu kơ mnuih ƀuôn sang ti să. Boh nik dŭm bruă đru ala ƀuôn, đru mkŏ mjing dŭm bruă ngă msĕ si ksiêm mkă klei ruă leh anăn mbha mnơ̆ng, mkŏ mjinh hdră bruă pui mtrang mngač, leh anăn đru kơ dŭm gŏ sang knŭk kna dlăng ba hruê ai mă bruă. Dŭm bruă mkŏ mjinh kơ phung hđeh hlăm gưl mdei prŏng yuôm bhăn snăk.

Mơ̆ng akŏ mlan 6 thŭn anei, čar Dak Lak pŏk ngă dŭm êpul êdam êra yan mdei prŏng mtah ti jih jang 15 kdriêk, wăl krah, ƀuôn prŏng hlăm čar. Truh ară anei, dŭm êpul anei đru mkra mrâo leh anăn mkra mđĭ 73 km êlan klông krĭng ƀuôn sang, mkŏ mjing 43 ktuê êlan mngač- mtah – doh- siam, 14 sang bi đru, 14 anôk kƀĭn, hlăp mbŭl kơ hđeh. Ksiêm mkă êdei Covid-19 kơ dŭm êbâo čô mnuih ƀuôn sang, ola dŭm pluh êbâo ana kyâo. Amai Nguyễn Phạm Duy Trang, Khua dlăng bruă êdam êra gưl dlông, Khua Êpul hgŭm đội gưl dlông lač: Phung mda asei Dak lak păn kjăp hdră kčah mơ̆ng Gưl dlông hlăm klei pŏk ngă bruă ngă, hlue ngă jăk dŭm boh phŭn mrâo hlăm hdră: Dak Lak pral mkŏ mjing leh anăn pŏk ngă dŭm boh phŭn leh anăn ktuê dlăng dŭm hdră kčah ăt msĕ mơh dŭm klei gĭt gai mơ̆ng bruă êdam êra gưl dlông. Tal sa hŏng 3 bruă klam “boh phŭn- mrâo – êdah kdldưn” hlăm klei gĭt gai mơ̆ng Bruă êdam êra gưl dlông. Anăn jing bruă ksiêm mkă êdei Covid-19 ăt kčĕ klei mĭn kơ phung êdam êra, hđeh điêt. Tal dua bruă kƀĭn mkŏ mjing leh anăn mkra sang tlô hlăm dŭm boh sang hră. Tal tlâo bruă mkŏ mjing dŭm êpul êdam êra ba anăp mlih mrô snăn ăt mâo čar bi mklă leh anăn ară anei jing anôk.

Dŭm hdră bruă, kdrêč bruă klă sĭt mguôp hŏng bruă mkŏ mkra krĭng ƀuôn sang mrâo, răng mgang wăl hdĭp mda, kriê dlăng kơ phung hđeh, rơ̆ng klei hdĭp mda ala ƀuôn mơ̆ng phung mda asei hlăm hdră phung êdam êra ba anăp yan bhag thŭn anei đru mđĭ ai, đru kơ mnuih ƀuôn sang leh anăn phung hđeh mâo klei hdĭp dleh dlan, boh nik krĭng taih kbưi, krĭng dleh dlan, đru mjing pŏk rup jăk siam mơ̆ng phung mda asei hlăm ai tiê mnuih ƀuôn sang alŭ wăl./.

H’ Zawut pô mblang