Aguah ưm ti alŭ 1, să Krông Ana. Hlăm war pla mmao prŏng dŭm pluh met, ayŏng Dương Huỳnh Linh hŏng mô̆ dôk bi luk adrăng, mđam mjeh mmao mprăp kơ gưl mmao mrâo. Mnâo mmao adrăng bi lŭk hŏng klei hơuh mđao, đung hlăm kluôm wăl. Ayŏng Linh mguôp hŏng bruă rông mmao mâo 14 thŭn, mơ̆ng dŭm anôk pla mjing tal êlâo, ară anei gru hmô ayŏng Linh amâo djŏ knŏng ba prăk hrui wĭt hơĭt kjăp ôh ƀiădah lŏ mjing bruă mă jêñ jêñ kơ dŭm pluh čô mnuih mă bruă alŭ wăl. Klei yăl dliê mphŭn čô̆ kơ bruă mơ̆ng ñu mđĭ ai kơ lu gŏ êsei mnuih ƀuôn sang jhŏng bi mlih - ruah bruă lŏ hma doh, ƀiă klei amâo myun ƀiădah ba klei tŭ dưn lu.

“Jih gŏ sang mơ̆ng dua nah găp djuê mđĭ kyar mơ̆ng mmao. Hlăk đưm gŏ sang phung hđeh ƀun ƀiădah mơ̆ng mmao snăn ară anei ăt djăp huă ƀơ̆ng leh”

Ăt hlăm krĭng lăn anei, phung mda asei dôk lŏ dơ̆ng lŏ ngă hlue si klei pô leh anăn yua kdrăp mrâo mrang. Hŏng ayŏng Huỳnh Đức Cường, 30 thŭn, tuôm hriăm Sang hră gưl prŏng hdră mnêč ti ƀuôn prŏng Hồ Chí Minh, bruă rông mmao amâo djŏ knŏng jing phŭn hdĭp ôh, ƀiădah lŏ jing sa gru hmô bruă lŏ hma thâo mĭn, jăk kơ ăl dhĭp mda, mđĭ ênoh yuôm mnơ̆ng dhơ̆ng lŏ hma alŭ wăl.

“Bruă anei mjing leh bruă mă kơ mnuih ƀuôn sang ti să, tal dua mjing leh prăk hrui wĭt lu. Sitôhmô msĕ si sang kâo 10 sang pla mjing snăn sa mkan prăk hrui wĭt bi liê mơ̆ng 20-30 êklăk prăk, ñu lŏ jưh kơ ênoh mmao mơh. Kâo ƀuh jing mâo êdei anăn, ñu jing sa hdră rông mơ̆ng adrăng pô wiă leh hlăm kdrăn lŏ pioh mkra mmao, leh anăn pô ba dưm hlăm phŭn kphêm tiu, durian, ñu jăk snăk”.

Hlue si klei alŭ wăl ksiêm yap, mơ̆ng dŭm gŏ êsei lông ngă, truh ară anei kluôm să Krông Ana mâo êbeh 1000 anôk pla mmao ngă bruă jih thŭn, mjing bruă mă kơ êbeh 2000 čô mnuih mă bruă. Amâo djŏ knŏng đru kơ mnuih ƀuôn sang hơĭt prăk hrui wĭt, bruă pla mmao đru mkhư̆ klei čuh adrăng, răng mgang wăl hdĭp mda leh anăn ba yua jih hnơ̆ng mnơ̆ng yua  hlăm bruă lŏ hma. Huỳnh Đức Phúc,  Khua hđăp hlăm Êpul hgŭm ƀĭng lŏ hma să, brei thâo:

“Klei găl tinei jing anôk phŭn pla mjing Krông Ana, kyua anăn snăn ƀĭng lŏ hma mâo phŭn adrăng čiăng hriăm kơ bruă pla mmao čiăng mđĭ kyar. Kah knar grăp gŏ êsei ƀiă êdi 2 anôk pla mjing, mâo gŏ êsei 10 anôk, 20 anôk. Mnuih ƀuôn snag đăo knang hlăm bruă pla mmao adrăng anei. Tal sa jing  bruă lŏ hma doh, anôk ba čhĭ snăn hơĭt kjăp kơ mnuih ƀuôn sang.”

 Mơ̆ng dŭm čăp adrăng leh yan hrui wiă, mnuih ƀuôn sang Krông Ana, čar Dak Lak mjing leh sa êlan nao kjăp; mjing hdră duh ƀơ̆ng, mjing lŏ hma knhuah gru jing gru hmô bruă duh mkra mtah.