Ñu mrâo nao ti Anôk bi kƀĭn bi mni kơ gru mngač êdah êdi, anăn jing Mnuih mâo kơhưm hlăm krĭng mnuih ƀuôn sang djuê ana ƀiă hlăm kluôm ala lehanăn dưi bi tuôm hŏng phung khua kiă kriê Đảng lehanăn Knŭk kna, kma asăp mtă mtăn mơ̆ng Khua lăn čar Võ Văn Thưởng kơ klei bi hgŭm mguôp djuê ana ti Lăn dap kngư, si ih bi mĭn kơ klei ngă măk ƀai bi kdơ̆ng hŏng knŭk kna ti kdriêk Čư̆ Kuiñ, čar Dak Lak, ơ H’Bliăk Niê? Ti gŭ anei, alum kơ ƀĭng găp drei mđing hmư̆ klei bi blŭ hrăm hŏng Ñu.

          Klei ngă măk ƀai bi kdơ̆ng hŏng knŭk kna ti 2 să Êa Tiêu lehanăn Êa Ktur, kdriêk Čư̆ Kuiñ, čar Dak Lak mâo sui hŏng anei 9 mlan leh, ƀiădah mâo lu mnuih ƀuôn sang ti dŭm krĭng ka thâo săng klă mơ̆ng kbiă hriê klei anei, akâo kơ ih brei thâo klei mĭn ih kơ boh klei anei?

H’Bliắk Niê: “Msĕ si drei thâo, mlam anăn jing mlam arăng ngă măk ƀai. Mnuih djuê ana Êđê drei mơ̆ng đưm đă lă ểlâo knŏng thâo bi kdơ̆ng hŏng phung roh, răng mgang klei h’ĭt ênang kơ ala čar, kơ ƀuôn sang. Kyua knŭk kna Cách mạng ba leh kơ drei sa klei hdĭp êđăp ênang. Klei anei jih jang drei thâo s’aĭ. Kyua anăn, jih jang mnuih ƀuôn sang ngêñ êdi kơ dŭm klei mčeh luar, amâo mâo sĭt. Mnuih ƀuôn sang amâo ư ai ôh hŏng dŭm klei duah mplư anei. Dŭm klei diñu duah luar anăn amâo mâo pô čiăng hmư̆ ôh. Knŏng mâo ƀiă đuič mnuih mda asei, diñu lač srăng brei prăk kăk, brei klei hdĭp sah mdrŏng. Mâo ƀiă mnuih mda asei ka thâo klă klei hdĭp ênuk đưm, ênuk Mi – Ngụy mkă hŏng ênuk cách mạng ară anei si jing. Lehanăn kyua kƀah klei thâo săng mơh diñu hmư̆ leh. Bi mnuih khua thŭn, diñu ƀuh lehanăn thâo leh. Knŏng knŭk kna cách mạng yơh ba wĭt klei hdĭp jăk, êđăp ênang.

Ti krĭng Lăn dap kngư tuôm mâo leh klei ngă rŭng, hŏng lu mnuih nao hgŭm ngă lagriâo bi kdơ̆ng hŏng knŭk kna hlăm dŭm thŭn 2001, 2004. Snăn, klei ngă măk ƀai bi kdơ̆ng hŏng knŭk kna gưl anei mâo ya klei mdê, akâo kơ ih brei thâo?

 H’Bliắk Niê: “Klei ngă rŭng hlăm thŭn 2004 lehanăn thŭn 2001, diñu amâo mâo phao lehanăn phung hmư̆ klei diñu hlăk anăn ară anei digơ̆ hƀlŏk leh, thâo bruă diñu ngă jing soh. Lehanăn ară anei, phung soh lŏ mplư phung mda asei kyua diñu amâo lŏ thâo mplư phung mduôn khua ôh – jing phung thâo klă leh klei soh jhat diñu ngă. 20 thŭn leh klei ngă rŭng hlăk anăn, ară anei, phung êdam, mda asei lŏ tui hmư̆ dŭm klei mplư, mčeh luar anăn. Truh kơ ară anei, hluê si kâo amâo lŏ mâo mnuih čiăng hmư̆ klei diñu lač ôh, kyua 2,3 leh klei diñu mčeh luar gơ̆ amâo jing sĭt ôh. Mbĭt anăn, klei lač mkŏ mjing knŭk kna Đêgar bơ̆k bâo lu blư̆ leh, mơ̆ng đưm êlâo, ƀiădah ka ƀuh ba wĭt klei tŭ dưn kơ mnuih ƀuôn sang ôh. Knŏng knŭk kna cách mạng, knŭk kna Đảng cộng sản yơh ba wĭt klei hdĭp mdrŏng sah, yâo m’ak kơ mnuih ƀuôn sang, ba wĭt klei êđăp ênang kơ ƀuôn sang”.

Klei ngă măk ƀai bi kdơ̆ng hŏng knŭk kna ti Dak Lak ba leh klei truh kjham êdi. Khă snăn, lu mnuih lač, Êpul hgŭm phat kđi bi mklă leh klei phat kđi hŏng phung soh dôk hdjul mơh. Si ih bi mĭn kơ klei anei?

H’Bliắk Niê: “Hruê phat kđi kâo mbĭt hŏng mnuih ƀuôn sang ăt tui ksiêm mơh. Kâo bi mĭn, Knŭk kna cách mạng khăp êdi kơ mnuih ƀuôn sang, kơ djuê ana pô. Diñu mdjiê leh mnuih amâo mâo klei soh, ƀiădah sang phat kđi ăt bi mklă hnơ̆ng hdjul, ăt čang hmăng diñu bi mlih, amâo lŏ ngă soh, hnưm dưi wĭt hŏng mô̆ anak, hŏng gŏ sang, hŏng ƀuôn sang; bi mlih klei mĭn, amâo hmư̆ klei phung jhat ôh, gĭr mă bruă knuă, rông ba anak čô, mkŏ mkra ƀuôn sang h’ĭt ênang”.

          Dưi thâo, ƀri gưl nao ti Klei bi kƀĭn bi mni gru mngač êdah êdi jing Mnuih mâo kơhưm hlăm êpul êya mnuih ƀuôn sang djuê ana ƀiă hlăm kluôm ala thŭn 2023, ih dưi bi tuôm leh hŏng phung khua kiă kriê Đảng lehanăn Knŭk kna, akâo kơ ih yăl dliê ƀiă klei anei hŏng mnuih ƀuôn sang drei?

H’Bliắk Niê: “Hlăm dŭm anôk bi kƀĭn prŏng ti Hà Nội, kâo mbĭt hŏng phung khua kiă kriê čar Dak Lak kreh nao lehanăn dưi bi tuôm hŏng phung khua kiă kriê ala čar. Kâo ƀuh mơak êdi kyua ƀuh Đảng, Knŭk kna drei mđing êdi kơ mnuih ƀuôn sang djuê ana ƀiă, mâo lu hdră mtrŭn kơ mnuih ƀuôn sang, boh nik hdră msir klei ư̆ êpa, bi hrŏ klei ƀun knap, mđĭ ai anak čô gĭr hriăm hră mơar, ngă bruă duh ƀơ̆ng mđĭ kyar hdră duh mkra. Mbĭt anăn, Khua lăn čar ăt mtă kơ phung knuă druh msĕ kâo anei, thâo khăp čiăng, đru kơ mnuih ƀuôn sang čiăng jih jang thâo klei mđing dlăng mơ̆ng Đảng, Knŭk kna truh kơ mnuih ƀuôn sang, mtă kơ mnuih ƀuôn sang amâo duah hmư̆ klei mčeh luar; mđĭ ai phung anak čô gĭr hriăm hră, êdei anei dưi mâo bruă mă h’ĭt kjăp.

Lač jăk kơ ih lu!