VOV4.Êđê - Čang rang aguah hruê 10/3/1975, dŭm êpul kahan knhăk mơ̆ng ala čar drei mđrăm mbĭt ksŭng mblah hlăm dŭm kđông kahan ti Mai Hắc Đế lehanăn dŭm kđông kahan mkăn ti wăl krah Ƀuôn Ama Thuôt, ară anei jing ƀuôn prŏng Ƀuôn Ama Thuôt mơ̆ng kngan phung roh lehanăn pral mâo mă klei tŭ dưi, pŏk hdră mblah tŭ dưi Buôn Ama Thuôt hƀuê ênuk mjing tur knơ̆ng kơ hdră mblah mtlaih êngiê kluôm dhuôm kwar Dhŭng hluh lir lăn čar. Leh 47 thŭn mtlaih êngiê, Ƀuôn Ama Thuôt mâo leh klei bi mlih hluê hdră “Mrâo mrang, kreh dhar lehanăn jiă knhuah djuê ana” mđing truh jing ƀuôn prŏng phŭn krĭng lăn dap kngư.

Đại tá Nguyễn Xuân Thụ, 67 thŭn, hlăm Trung đoàn 25 kahan sua mă klei êngiê krĭng Krah kwar Krah jing pô tuôm găn leh hlăm klei bi blah ti Lăn Dap Kngư thŭn 1975, ară anei jing mnuih dôk hdĭp hlăm ƀuôn prŏng anôk ñu bi blah. Lŏ nao čuă hjiê phao ktuang Mai Hắc Đế, ƀuôn hgŭm Tân Thành, ñu yăl dliê, leh klei bi blah anôk anei tuôm hŏng klei boh phao ktuang ksŭl kčư̆, mnuih hdĭp knŏng ƀiă. Ƀiădah ară anei, Mai Hắc Đế jing leh sa alŭ wăl ƀuôn prŏng mjhĭt m’uăt mnuih. Kđông Mai Hắc Đế jing leh knhuah gru hƀuê ênuk gưl ala čar. Thụ yăl dliê: “Trung đoàn mrô 25 mơ̆ng diñu mâo bruă čuăn mblah khăt êlan mrô 21 jing êlan dơ̆ng prŏng mrô 26 mơ̆ng ƀuôn prŏng Ƀuôn Ama Thuôt nao kơ Nha Trang ară anei. Êpul kahan hmei mblah găn kŏ ti kngư čư̆ 519, tĭng nah Dưr wăl krah kdriêk Mdrak, anăn jing pôih Bảo An. Hmei bi mtuh phao ktuang mơ̆ng aguah ưm hrue 5/3, čiăng pŏk êlan kơ klei ksŭng mblah wăl krah Ƀuôn Ama Thuôt. hlăm aguah ưm hrue 10/3, êpul lĭng kahan mơ̆ng Sư đoàn 320 ksŭng mŭt hlăm alŭ wăl Mai Hắc Đế leh kơ anăn mâo mă kluôm jih Ƀuôn Ama Thuôt, bi Sư đoàn 10 snăn pŏk êlan ksŭng mblah Đức Lập, ti kdriêk Dakmil, čar Daknông ară anei, mlam hrue 11/3 snăn lĭng kahan pô mâo mă jih djăp kdrăn mblah, klei bi blah ti Lăn Dap Kngư mâo mă klei dưi kluôm dhuôm”.

Mơ̆ng sa wăl krah rai kyua klei bi blah, êdei kơ 47 thŭn rŭ mdơ̆ng mđĭ kyar, truh kơ ară anei ƀuôn prŏng Ƀuôn Ama Thuôt jing leh sa boh ƀuôn prŏng mjhĭt m'uăt, ênuk mrâo, jiă knhuah gru dhar kreh. klei hdĭp phung ƀuôn sang kơ anei knư̆ hrue knư̆ mâo klei đĭ kyar, êlan klông, bruă mdrao mgŭn, sang hră mơar klei hdĭp mda đĭ kyar. Khua mduôn Y-Siu ƀuôn Yă, ti ƀuôn Mdŭk, ƀuôn hgŭm Êa Tam lač:  “Êlâo dih klei hdĭp mda phung ƀuôn sang knap mñai snăk ƀiadahg leh mâo Đảng, knŭk kna mđing uêñ snăn dơ̆ng mâo klei bi mlih. Ară anei êlan klông hlăm ƀuôn mâo ngă hŏng betong leh sơăi, jih jang phung ƀuôn sang mâo leh sơăi pui kmlă yua. Grăp gŏ sang mâo leh êdeh p'phŭt, đa sang tloh blei leh êdeh pui”.

Buôn Ama Thuôt jing leh ƀuôn prŏng mâo lu mnuih hdĭp hĭn ti alŭ wăl Lăn Dap Kngư, ƀuôn prŏng ară anei mâo giăm 380 êbâo čô mnuih, êbeh 40 djuê ana ayŏng adei hdĭp mbĭt mbla. Êlan klông ară anei hlăm ƀuôn prŏng jăk siam, lehanăn hlăk mâo tač êdeh phiơr phiơr nao hlăm dŭm boh čar, ƀuôn prŏng hlăm ala čar, lehanăn dôk lŏ rŭ mkra prŏng pioh phiơr truh hŏng ala tač êngao. Jih jang êlan dơ̆ng yŭ ngŏ, dhŭng dưr mâo ngă jăk siam; sang hră mơar, bruă mdrao mgŭn mâo mđĭ kyar, 8 boh să hlăm ƀuôn prŏng dưi bi leh mta kñăm ala čar čoh čuăn krĭng ƀuôn sang mrâo; 13 boh ƀuôn hgŭm jing leh ƀuôn hgŭm dhar kreh, hnơ̆ng hrui wĭt kah knar grăp čô mnuih mâo giăm 100 êklăk prăk hlăm thŭn 2021, mâo rŭ mdơ̆ng leh lu alŭ wăl duh mkra mnia mblei, dŭm anôk rŭ mdơ̆ng sang dôk mâo rŭ mkra jăk siam, hnơ̆ng đĭ kyar kah knar tĭng hlăm 5 thŭn êgao jing djăp mơ̆ng 11 – 12%/thŭn. Từ Thái Giang Khua bruă Đảng ƀuôn prŏng Ƀuôn Ama Thuôt lač, čiăng mâo rŭ mdơ̆ng ƀuôn prŏng Ƀuôn Ama Thuôt jing ƀuôn phŭn kơ Lăn Dap Kngư, dŭm gưl dhar bruă mkŏ mjing hlue ngă djăp kle ibhiăn djŏ guôp mđĭ kyar hlăm grăp kdrêč:  “Ƀuôn prŏng hlăk jih ai tiê ruh mgaih djăp mta bruă dôk dleh kpăk klei kơ lăn ala, hrŏng ruah iêo jak phung duh bi liê bi djŏ hŏng bruă mđĭ kyar. Hyuă kjăp bruă mjuăt bi hriăm mnuih ngă bruă mâo klei thâo bi djŏ hŏng ênuk 4.0, bi mlih hdră êlan mă bruă. Mđĭ klei thâo săng hlăm êpul phung đảng viên, lehanăn phung ƀuôn sang kơ bruă thâo săng klei yuôm bhăn kơ bruă rŭ mdơ̆ng ƀuôn prŏng, kñăm čiăng bi leh bruă kčah jao”.

Tui si Nguyễn Đình Trung, Khua bruă Đảng čar Daklak, hlăm klei klah čŭn mrô 67 mơ̆ng Phŭn bruă kđi čar thŭn 2019 lač klă kơ bruă čuăl mkă mđĭ kyar truh kơ thŭn 2030, lehanăn tă hdră truh kơ thŭn 2045, ƀuôn prŏng Ƀuôn Ama Thuôt, ƀuôn knơ̆ng kơ čar Daklak, lehanăn anăp jing ƀuôn prŏng phŭn kơ krĭng Lăn Dap Kngư, hlue hdră “Dhar kreh, ênuk mrâo lehanăn jiă knhuah gru dhar kreh”. Čiăng dưi bi leh jih mta kñăm, dŭm thŭn leh êgao Đảng lehanăn knŭk kna duh bi liê leh dŭm pluh êbâo êklai prăk rŭ mkra êlan dơ̆ng prŏng Hồ Chí Minh găn čar Daklak, rŭ mdơ̆ng sang êa drao prŏng kri|ng Lăn Dap Kngư, mkra êlan Dar Yŭ Ngŏ, mkra mđĭ tač êdeh phiơr Ƀuôn Ama Thuôt. Čiăng mđĭ jing ƀuôn prŏng kơ krĭng Lăn Dap kngư. Nguyễn Đình Trung brei thâo, hdră mtrŭn klei bi kƀĭn prŏng Đảng čar Daklak tal 17 wưng păn bruă 2020 – 2025 ăt tă čua leh lehanăn mâo leh klei čuăl mkă bruă čuăn rŭ mdơ̆ng ƀuôn prŏng Ƀuôn Ama Thuôt jing ƀuôn phŭn kơ krĭng Lăn Dap Kngư, hlue hŏng klei klah čŭn mrô 67 mơ̆ng phŭn bruă kđĭ čar:  “Tal sa, mđing čuăl mkă ƀuôn Ama Thuôt bi djŏ guôp hŏng klei čar lehanăn kluôm ala čuăl mkă, bi djŏ hŏng jih jang hdră čuăl mkă klei kơ lăn ala hlăm wưng kơ anăp. Tal dua, rŭ mdơ̆ng Ƀuôn prŏng Ƀuôn Ama Thuôt kluôm ênŭm, kjăp hlăm djăp mta. Leh kơ anăn, dưn yua jih ai ktang lehanăn klei duh bi liê mơ̆ng gưl dlông mđing mđĭ kyar jih jang bruă phŭn, amâo mâo nga ling lang sui hrue, ƀiădah ƀrư̆ ƀrư̆ mjing ƀuôn prŏng jing ƀuôn phŭn kơ krĭng Lăn Dap Kngư. Tal 4, mdid\ kyar bruă duh mkra ala ƀuôn hlăm ƀuôn prŏng hlăm klei mlih mrâo mđĭ kyar bruă duh mkra, mđĭng bi kjăp klei mđĭ kyar, bi năng hŏng klei mđĭ kyar bruă tuh tia mơh”.

Hŏng ai ktang klei dưi hrăm mbĭt hŏng klei gĭr klei kut kat mơ̆ng jih bruă kđi čar, klei sa ai mơ̆ng jih iang phung ƀuôn sang, amâo mâo sui ôh ƀuôn prŏng Ƀuôn Ama Thuôt srăng dưi jing yơh ƀuôn prŏng phŭn kơ krĭng Lăn Dap Kngư. Anei srăng jing anôk kdrưh k’ăm êdi kơ ƀuôn prŏng, amâo mâo djŏ knŏng kơ dŭm čar hlăm krĭng Lăn Dap Kngư ƀiă dah hŏng kluôm ala./.